काठमाडौँ, २७ वैशाख । खानेपानी तथा ढल निकास विभागले भूकम्प प्रभावित जिल्लाका खानेपानी र सरसफाइ संरचनाको पुनःनिर्माण सुरु गरेको छ ।
गत वर्षको भूकम्पबाट क्षति पुगेका ३१ मध्ये १४ जिल्लालाई अति प्रभावित र १७ जिल्लालाई मध्यप्रभावित घोषणा गर्दै पुनःनिर्माणसँगै पुनःसंरचना गर्न लागिएको आज यहाँ आयोजित कार्यक्रममा जानकारी दिइयो । अति प्रभावित जिल्लामा गोरखा, धादिङ, सिन्धुपाल्चोक, काभ्रेपलाञ्चोक, दोलखा, रसुवा, रामेछाप, सिन्धुली, काठमाडौँ, भक्तपुर, ललितपुर, नुवाकोट, मकवानपुर र ओखलढङ्गा छन् । त्यस्तै अन्य प्रभावितमा धनकुटा, खोटाङ, सोलुखुम्बु, तनहुँ, बाग्लुङ, गुल्मी, पर्वत, पाल्पा, नवलपरासी, म्याग्दी, चितवन, लमजुङ, कास्की, स्याङ्जा, भोजपुर, सङ्खुवासभा र अर्घाखाँची छन् ।
देशभर करिब पाँच हजार २०० खानेपानी योेजनाका संरचनामा क्षति पुगेको छ । ती संरचनाको मूल्याङ्कन गर्दा रु ११ अर्ब बराबरको भौतिक क्षति हुन आएको विभागको भनाइ छ । पुनःनिर्माणका लागि झन्डै रु १८ अर्ब लाग्ने तथा पाँच वर्षभित्र काम सकिने जिकिर छ । यद्यपि सरकारले राष्ट्रिय पुनःनिर्माण प्राधिकरणमार्फत रु ८४ करोड १६ लाख ८४ हजार छुट्याएको र बाँकी विभिन्न दातामार्फत जुटाइने पत्रकार सम्मेलनमा जानकारी दिइयो ।
सो अवसरमा खानेपानी तथा सरसफाइमन्त्री प्रेमबहादुर सिंहले मेलम्ची खानेपानी आयोजना बढीमा डेढ वर्षभित्रमा सफल पार्न सरकार लागिपरेको बताउनुभयो । उहाँले त्यसका लागि करिब ६० प्रतिशत काम भइसकेको जानकारी दिँदै भन्नुभयो, “एक वर्षभित्र टनेलको काम सकिन्छ, अरु छ महिनामा सबै काम सकेर काठमाडौँमा मेलम्ची आइपुग्छ ।” मन्त्री सिंहले यस वर्ष गत वर्षभन्दा दोब्बर बजेट खानेपानी र सरसफाइ क्षेत्रका लागि वृद्धि गरिने बताउनुभयो ।
विभागका महानिर्देशक रामचन्द्र देवकोटाले भूकम्प प्रभावित जिल्लाका जनतालाई तत्काल खानेपानी र सरसफाइको सुविधा पु¥याउने लक्ष्यअनुरुप विभाग अघि बढेको बताउनुभयो । रासस
No comments:
Post a Comment