ललितपुर, २१ जेठ । नेपाली काँग्रेसका सभापति एवम् पूर्वप्रधानमन्त्री शेरबहादुर देउवाले देश विकासमा भूतपूर्व सैनिकको योगदान महत्वपूर्ण रहेको बताउनुभएको छ ।
नेपाली काँग्रेसका भातृसंस्था नेपाल भूतपूर्व सैनिक सङ्घको पाँचौँ महाधिवेशनको आज यहाँ उद्घाटन गर्दै उहाँले आफ्नो घरपरिवार छाडेर विदेशी भूमिमा परिश्रम गरेर नेपालमा पठाएको पैसाले देशको आर्थिक विकासमा उल्लेखनीय भूमिका खेलेको बताउनुभयो । सभापति देउवाले विकाससँगै प्रजातन्त्र प्राप्ति र काँग्रेसका लागि सङ्घको योगदान महत्वपूर्ण रहेको बताउनुभयो । महाधिवेशनले देश हाँक्न सक्ने नेतृत्व चयन गर्ने उहाँले विश्वास व्यक्त गर्नुभयो ।
सो अवसरमा काँग्रेस वरिष्ठ नेता रामचन्द्र पौडेलले नेपाली समाजमा भइरहेको आधुनिक रहनसहनको विकासको सभ्यता पस्कन भूपू सैनिक सङ्घको योगदान रहेको बताउनुभयो । पार्टीसँग सङ्घको घनिष्ट सम्बन्ध रहेको समेत उहाँले उल्लेख गर्नुभयो ।
सङ्क्रमणकालीन अवस्थामा गाउँ–गाउँमा काँग्रेसलाई बचाएर राख्न सङ्घमा आबद्ध साथी र शिक्षक सङ्घको महत्वपूर्ण योगदान रहेको नेता पौडेलको भनाइ थियो । सङ्घलाई हालसम्म पार्टी र राज्यका तर्फबाट कुनै किसिमको कार्यक्रम दिन नसकेकामा उहाँले चिन्ता व्यक्त गर्नुभयो ।
गाउँ–गाउँमा सहकारीको स्थापना गरेर रोजगारीको सिर्जना गर्न र आर्थिक विकास गर्न सङ्घलाई उहाँले आग्रह गर्नुभयो । विकाससँगै आर्थिक समृद्धि र देशको विकास हुन सक्ने नेता पौडेलको भनाइ थियो । विदेशमा सिकेका भूपू सैनिकको सीपलाई स्वदेशमा सदुपयोग गरेर राष्ट्रलाई बलियो बनाउनसक्ने उहाँको विश्वास थियो ।
नेता पौडेलले काँग्रेसको नेतृत्वमा बनेको संविधानको कार्यान्वयन आफ्नै नेतृत्वमा हुनुपर्नेमा जोड दिनुभयो । उहाँले स्थानीय निकायको निर्वाचन हुनुपूर्व गाउँपालिका बनाउनुपर्ने आवश्यक रहेको बताउनुभयो ।
सो अवसरमा सङ्घलाई योगदान दिनुहुने पूर्वसांसद एवम् सङ्घका संरक्षक दीपकबहादुर गुरुङ, सांसद दिलमान पाख्रिन, चौबहादुर गुरुङ, मोतीप्रसाद आले, केशवबहादुर गुरुङ र कौशिला गुरुङलाई विशेष सम्मान गरिएको थियो ।
सङ्घले प्रकाशित गरेको भूपू सैनिक सन्देश नामक स्मारिकाको काँग्रेस सभापति देउवा र वरिष्ठ नेता पौडेलले एकसाथ विमोचन गर्नुभएको थियो । महाधिवशेनमा भाग लिन देशभरबाट ३९९ प्रतिनिधि सहभागी भएको सङ्घका अध्यक्ष नारायणप्रसाद कोइरालाले जानकारी दिनुभयो । रासस
No related posts.
No comments:
Post a Comment