आज राष्ट्रिय धान दिवस मनाइँदै

काठमाडौ, १५ असार । राष्ट्रिय धान दिवस आज देशभरमा विभिन्न कार्यक्रम गरी मनाईंदैछ । दिवसको अवसरमा आज सरकार, गैरसरकारी संस्था र दलका कृषि समितिहरुले विभिन्न कार्यक्रम गर्दैछन् ।
नेपाली किसानले आजको दिनलाई मानो रोपेर मुरी फलाउने दिनका रूपमा लिने गरेका छन् । नेपालले २०६२ देखि असार १५ लाई राष्ट्रिय धान दिवसका रूपामा मनाउँदै आएको छ । यस वर्ष १३औँ धान दिवस ‘व्यावसायिक धान खेतीको आधार, सामुदायिक नर्सरीको विस्तार’ भन्ने नाराका साथ मनाउन लागिएको छ ।
राजधानी बाहिर पनि सरकारी तथा गैरसरकारी निकायले धान दिवसको अवसरमा बिभिन्न कार्यक्रम गर्दैछन् । आजको दिनलाई रोपाई महोत्सव र दही चिउरा खाने दिनका रुपमा लिने गरिन्छ । कृषिमा परनिर्भरता बढ्दै गएका कारण उत्पादकत्व बढाउने उद्देश्यले नेपालमा धान दिवस मनाउन थालिएको हो ।
धानबालीका लागि योग्य कूल करिब १४ लाख २५ हजार हेक्टर जग्गा मध्ये असार १४ हिजोसम्म १० प्रतिशत मात्र रोपाइँ भएको छ । धान नेपालको प्रमुख खाद्यान्न बाली हो । नेपालमा चैते धान, वर्षे धान, घैया धानको खेती हुँदै आएको छ ।
पानी समयमा परेका कारण यसबर्ष किसानहरु खुसी देखिएको छन् । तराईको कुल भूभागको करिब ७० प्रतिशत पहाडी क्षेत्रको कूल भूभाग मध्ये करिब २६ प्रतिशत र हिमाली क्षेत्रको कूल भूभाग मध्ये करिब पाँच प्रतिशत जग्गामा धानबाली हुने गरेको छ ।

No related posts.