योगलाई मानवीय जीवन दर्शनका रुपमा विकास गर्नुपर्छ – मन्त्री पोखरेल

भक्तपुर, ११ असार । संस्कृति, पर्यटन तथा नागरिक उड्डयन मन्त्री आनन्दप्रसाद पोखरेलले योगलाई मानवीय जीवन दर्शनका रुपमा विकास गर्नुपर्ने बताउनुभएको छ ।

आज भक्तपुरमा दोस्रो अन्तर्राष्ट्रिय योग दिवसका अवसरमा विश्व योग दिवस मूल आयोजक समिति भक्तपुरले आयोजना गरेको योग दिवस कार्यक्रममा बोल्दै उहाँले यस्तो धारणा राख्नुभएको हो ।
उहाँले भन्नुभयो ˗ “योगले नै मानव जीवनमा शान्ति ल्याउँछ, मानिसको शरीर र मानसिकतालाई शान्त बनाउँछ, चित्त शुद्ध पार्छ, हिंसामुक्त समाजको निर्माण गर्छ ।”

नेपालको हिमालय पर्वतबाट योग सुरु भएको बताउँदै उहाँले भगवान महादेवले योग गरेर यसको सुरुवात गरेको र यसलाई ऋषिहरुले निरन्तरता दिएको उहाँको भनाइ थियो ।
मन्त्री पोखरेलले चारवटै वेदमा समेत योगको चर्चा भएको र यसमा नेपालको भू–भागको चर्चा गरेको बताउँदै बुद्धले योगकै माध्यमबाट बुद्धत्व प्राप्त गरेको चर्चा गर्नुभयो ।

कार्यक्रममा समितिका संयोजक एवम् प्रमुख जिल्ला अधिकारी तेजप्रसाद पौडेलले भक्तपुरलाई योग जिल्ला घोषणा गर्न १५१ सदस्य रहेको समिति बनाएको बताउँदै योगलाई जीवनसँग जोडेर लैजाने बताउनुभयो ।
स्थानीय विकास अधिकारी ध्रुव कोइरालाले भक्तपुरलाई योग जिल्ला घोषणा गर्न चालिएको अभियान सफल भएको बताउनुभयो ।
कार्यक्रममा दरबार क्षेत्रमा योग गरिएको थियो भने ५० घन्टा १५ मिनेटसम्म योग म्याराथुन गरेर विश्व रेकर्ड राख्ने उत्तम मोक्तानलाई मन्त्री पोखरेलले सम्मान गर्नुभएको थियो ।

कार्यक्रममा पतञ्जलि योग, ब्रह्मकुमारी राजयोग, मनोक्रान्तिलगायत विभिन्न संस्थाको सहभागिता रहेको थियो । रासस

No related posts.