रत्ननगर (चितवन), २७ जेठ । चितवन राष्ट्रिय निकुञ्ज र पर्सा वन्यजन्तु आरक्षमा क्षेत्रमा हुने मानव र वन्यजन्तुबीचको द्वन्द्व न्यूनीकरणका लागि पाँच जिल्लाका रेडियोबीच नेटवर्क बनाइएको छ ।
निकुञ्ज र पर्सा वन्यजन्तु आरक्षभित्र पर्ने पाँच जिल्लाका रेडियो प्रसारण संस्थाको नेटवर्क गठन भएको हो ।
चितवनको माडीस्थित सामुदायिक रेडियो माडीको अगुवाइमा चितवन, नवलपरासी, बारा, मकवानपुर र पर्सा जिल्लाका १८ वटा रेडियोको संलग्नतामा नेटवर्क गठन गरिएको राष्ट्रिय प्रकृति संरक्षण कोष सौराहा चितवनले जनाएको छ ।
नेटवर्कमा संलग्न अन्य रेडियोमा हाल पर्सा जिल्लाको रेडियो नारायणी र रेडियो विजयवस्ती, बारा जिल्लाको रेडियो समर्पण र रेडियो आकाशवाणी, मकवानपुरको रेडियो शक्ति, नवलपरासीको रेडियो मध्यबिन्दु, ह्याप्पी एफएम र विजय एफएम तथा चितवन जिल्लाका कालिका एफएम, रेडियो त्रिवेणी, हाम्रो एफएम, रेडियो शिवशक्ति, रेडियो सम्पदा, रेडियो अर्पण, ग्रेट एफएम र सिराइचुली एफएम संलग्न छन् ।
सो नेटवर्कले निकुञ्ज र आरक्षका मध्यवर्ती क्षेत्रका मानव र वन्यजन्तुबीचको द्वन्द्व न्यू्नीकरण गर्ने विश्वास छ । यहाँको जैविक विविधता संरक्षण र वन एवम् वनपैदावरको संरक्षणका निम्ति रेडियो कार्यक्रम उत्पादन तथा सूचना एवम् समाचार प्रसारण गरेर द्वन्द्व न्यूनीकरणमा महत्वपूर्ण भूमिका खेल्ने छ ।
नेटवर्कमा संलग्न प्रसारण संस्थासँग राष्ट्रिय प्रकृति संरक्षण कोष, तराई भूपरिधि कार्यक्रम (ताल), चितवन राष्ट्रिय निकुञ्ज, पर्सा वन्यजन्तु आरक्षले सहकार्य गर्ने जनाएको छ ।
राष्ट्रिय प्रकृति संरक्षण कोष–जैविक विविधता संरक्षण केन्द्रका अनुसन्धानकर्ता एवम् संरक्षण अधिकृत सन्तोष भट्टराईले नेटवर्कले संरक्षण र द्वन्द्व न्यूनीकरणमा सहयोग पुग्ने विश्वास व्यक्त गर्नुभयो ।
अर्का संरक्षण अधिकृत शशाङ्क पौडेलले संरक्षणमा सञ्चारमाध्यामको भूमिका महत्वपूर्ण रहेको बताउनुभयो । रासस
No related posts.
No comments:
Post a Comment