जुनसुकै विषय अध्ययन गरे पनि उत्कृष्टता हासिल गर्न सल्लाह

बुटवल, १३ असार । नेकपा (एमाले) का केन्द्रीय सदस्य रवीन्द्र अधिकारीले काँग्रेसले प्रधानमन्त्रीलाई सदनमा बोल्न नदिएर कस्तो लोकतन्त्रको अभ्यास गरिँदै छ भनी प्रश्न गर्नुभएको छ ।

अनेरास्ववियु रुपन्देहीले आज यहाँ आयोजना गरेको प्रवेशिका उत्तीर्ण विद्यार्थी सम्मान कार्यक्रमलाई सम्बोधन गर्दै नेता अधिकारीले बहुमतप्राप्त प्रधानमन्त्रीलाई संसद्मा बोल्न नदिने काँग्रेस नक्कली प्रजातन्त्रको हिमायती भएको आरोप लगाउनुभयो ।

“ डा रामशरण महत अर्थमन्त्री भएको समयमा भूकम्पपीडितलाई एकमुष्ट रु ५० हजार दिनुपर्छ भन्दा त्यति त मिल्दैन भनियो, अहिले आएर सदन अवरुद्ध गरी एकमुष्ट रु दुई लाख दिनुपर्छ भन्ने नाजायज माग राखेर सदन अवरुद्ध गरी काँग्रेसले कस्तो लोकतन्त्रको अभ्यास गर्दैछ” उहाँले प्रश्न गर्नुभयो ।

व्यवस्थापिका–संसद्, विकास समितिका सभापति अधिकारीले एमालेले ल्याएको लोकप्रिय बजेट देखेपछि काँग्रेसले अतालिएर नाजायज माग राखेर सदनमा अवरुद्ध गर्न थालेको बताउनुभयो । उहाँले विद्यार्थीहरुलाई जुनसुकै विषय अध्ययन गरे पनि त्यसमा उत्कृष्टता हासिल गर्न सल्लाह दिनुभयो ।
कार्यक्रममा अनेरास्ववियुका अध्यक्ष नवीना लामाले सरकारले ल्याएको शिक्षा विधेयक छिट्टै कार्यान्वयन हुनुपर्ने बताउँदै अबको शिक्षा राष्ट्रिय उत्तरदायित्व सहितको हुनुपर्ने बताउनुभयो । कार्यक्रममा जिल्लाका निजी तथा सामुदायिक विद्यालयका उत्कृष्ट विद्यार्थी र विद्यालयलाई सम्मान गरिएको थियो । रासस

No related posts.