‘क्रसरोड्स’ सार्वजनिक

काठमाडौँ, २६ असार । पोखरा विश्वविद्यालयको उच्च शिक्षा अध्ययन संस्थान (आएसर)ले ‘क्रसरोड्स’(चौबाटो) शीर्षक कथासङ्ग्रह बजारमा ल्याएको छ ।
दुई वर्षअघि ल्याइएको हुलाकी सङ्ग्रहबाट साहित्य प्रकाशन सुरु गरेको संस्थाले १७ कथाकारका एक एक कथा समेटेर सो कृति सार्वजनिक गरेको हो । सङ्ग्रहलाई महेश पौड्यालले सम्पादन गर्नुभएको हो ।
कृति विमोचन गर्दै प्रा डा सञ्जीव उप्रेतीले आफू सो कृतिभित्र सङ्गृहीत कथाले बोकेको स्थानीय रङबाट निकै रोमाञ्चित भएको बताउनुभयो । उनले पश्चिमका लेखिएका सबै राम्रो तथा पूर्वको नराम्रो भनेर पूर्वाग्रह पाल्नेहरूका लागि यो पुस्तक एउटा कसिलो जवाफ भएको जिकिर गर्नुभयो ।
प्रा अम्मरराज जोशीले सङ्गृहीत कथाका सांस्कृतिक पक्ष निकै बलियो भएको तर केही कथामा भने भाव निकै मर्मस्पर्शी भए पनि विवरणको कमी खड्किएको टिप्पणी गर्नुभयो ।
समालोचक अरुण गुप्तोले प्रकाशनको निरन्तरताप्रति सन्तोष व्यक्त गर्नुभयो । रासस

No related posts.