उर्लाबारी (मोरङ), २७ साउन । मोरङको दादरबैरिया–८ मा बुधबार ट्र्याक्टरले किचेर एक बालकको मृत्यु भएको छ ।
आफ्नै घर अगाडि पार्किङ गरेको को १ त ४०४७ नंको ट्र्याक्टरले किचेर चन्द्रनारायण रायका १२ वर्षीय छोरा नीरजकुमार रायको मृत्यु भएको हो ।
ट्र्याक्टरले किचेर गम्भीर घाइते भएका बालकलाई उपचारका लागि विराटनगर लैजानेक्रममा बाटोमै मृत्यु भएको जिल्ला प्रहरी कार्यालय मोरङका प्रहरी नायब उपरीक्षक योगेन्द्रसिंह थापाले जानकारी दिनुभयो ।
घरको आँगनमा रोकिराखेको ट्र्याक्टरमा खेल्ने क्रममा अचानक सो ट्र्याक्टर गुडेपछि ओर्लन खोज्दा रायलाई किचेको थियो ।
नवजात शिशुको मृत्यु
यसैबीच, मोरङको विराटनगर–७ सरौचियामा बुधबार बेवारिसे अवस्थामा फेला परेको एक नवजात शिशुको मृत्यु भएको छ ।
नहरको डिलमा अचेत अवस्थामा जन्मनेबित्तिकै फालेको शिशु (छोरी) लाई स्थानीयवासीले फेला पारेपछि प्रहरीलाई खबर गरेका थिए ।
प्रहरीले तत्कालै शिशुलाई कोसी अञ्चल अस्पतालमा लगेर भर्ना गरेको केही बेरमै शिशुको उपचारका क्रममा मृत्यु भएको हो ।
अवैध सम्बन्धबाट जन्मिएपछि शिशुलाई कसैले जिउँदै फालेको प्रहरीको भनाइ छ । शिशु कसले र किन फालेको हो भन्ने विषयमा अनुसन्धान सुरु गरिएको प्रहरीले जनाएको छ । रासस
No comments:
Post a Comment