काठमाडौँ, १५ भदौ । राष्ट्रिय खेलकुद परिषद् (राखेप) ले आफ्नो ५३औँ वार्षिकोत्सवका अवसरमा छ कर्मचारी तथा त्यत्ति नै सङ्ख्यामा विभिन्न सञ्चारमाध्यमका खेल पत्रकारलाई सम्मान गरेको छ ।
त्रिपुरेश्वरस्थित राखेपमा आज आयोजित कार्यक्रममा युवा तथा खेलकुदमन्त्री दलजित श्रीपाइली, खेलकुद मन्त्रालयका सहसचिव चूडामणि पौडेल, राखेप सदस्य सचिव केशवकुमार विष्टलगायतले पुरस्कृत गर्नुभयो । प्रशासनतर्फ सर्वोत्कृष्ट परिषद् सेवा पुरस्कारबाट मोरङ जिल्ला खेलकुद विकास समितिका प्रमुख देवराज कटवाल, उत्कृष्ट परिषद् सेवा पुरस्कारबाट कर्मचारी प्रशासन शाखाका नायब सुब्बा सुकुमार थापा तथा परिषद् सेवा पुरस्कारबाट आर्थिक प्रशासन शाखाकी लेखा अधिकृत ज्ञानु घिमिरे सम्मानित हुनुभयो । कटवालले रु २५ हजार, थापाले रु १५ हजार तथा घिमिरेले रु १० हजारसहित सम्मानपत्र प्राप्त गर्नुभयो ।
प्राविधिकको सर्वोत्कृष्ट परिषद् सेवा पुरस्कारबाट कञ्चनपुर जिल्ला खेलकुद विकास समितिका भलिबल सहायक प्रशिक्षक जगदीशप्रसाद भट्ट, उत्कृष्ट परिषद् सेवा पुरस्कारबाट बाँके जिल्ला खेलकुद विकास समितिका जुडो प्रशिक्षक दलबहादुर गुरुङ तथा परिषद् सेवा पुरस्कारबाट उदयपुर जिल्ला खेलकुद विकास समितिकी कबड्डी सहायक प्रशिक्षक पार्वती राई पुरस्कृत हुनुभयो । उहाँहरुले पनि प्रशासनसरह नै पुरस्कार र सम्मानपत्र प्राप्त गर्नुभयो ।
त्यस्तै सम्मानित हुने खेल पत्रकारमा अन्नपूर्ण दैनिकका रोशनकुमार सिंह (राउत), नयाँ पत्रिका दैनिकका श्रीलोचन राजोपाध्याय, कान्तिपुर दैनिकका विनोद पाण्डे, द हिमालयन टाइम्सका फोटो पत्रकार उदिप्तसिंह क्षेत्री, नागरिक दैनिकका प्रकाश तिमल्सिना तथा कान्तिपुर टेलिभिजनका प्रदीप लेखी रहेका छन् ।
सोही अवसरमा परिषद्मा २५ वर्ष सेवा पूरा गरेका ११ कर्मचारीलाई दीर्घ सेवा पदक प्रदान गरियो । त्यस्तै २० वर्ष सेवा अवधि पार गरेका १३६ जनालाई परिषद् सेवा पदकबाट विभूषित गरियो ।
कार्यक्रममा मन्त्री श्रीपाइलीले सातौँ राष्ट्रिय खेलकुद निर्धारित समयमै हुने बताउँदै काम गर्ने कर्मचारीलाई पुरस्कृत र नगर्नेलाई दण्डित गर्ने नीतिलाई सँगसँगै लिएर अगाडि बढ्ने बताउनुभयो ।
वार्षिकोत्सवकै अवसरमा ७५ जिल्ला तथा पाँच विकास क्षेत्रका खेलकुद कार्यालयमा विविध कार्यक्रम भएका थिए । रासस
No comments:
Post a Comment