काठमाडौँ, ८ कात्तिक । काठमाडौँ उपत्यकाको दैनिक जीवन झल्किने तस्बिरहरुको सङ्गालो ‘अ डे इन द लाइफ अफ काठमाडौँ’ को आज यहाँ सार्वजनिक गरिएको छ ।
भारतीय राजदूतावासले आयोजना गरेको कार्यक्रममा परराष्ट्रमन्त्री डा प्रकाशशरण महतले लेखक तथा छविकार जावेद अशरफद्वारा सङ्कलित तस्बिर सङ्गालिएको उक्त पुस्तक सार्वजनिक गर्नुभएको हो ।
मन्त्री डा महतले लेखक तथा छविकार अशरफले तयार पार्नुभएको पुस्तकले काठमाडौँको दिनचर्या, परम्परा र संस्कृतिलाई विश्वसमक्ष पु¥याउन मद्दत पुग्ने विश्वास व्यक्त गर्नुभयो ।
लामो समय नेपाल र भारतको विदेश मन्त्रालयका विभिन्न तहमा रही काम गर्नुभएको अशरफको पुस्तक प्रकाशन गरेर नेपालको सांस्कृतिक दूतका रुपमा काम गरेको भन्दै मन्त्री महतले प्रशंसा गर्नुभयो ।
कार्यक्रममा नेपालका लागि भारतीय राजदूत रणजित रायले ऐतिहासिक तथा धार्मिक सम्पदाले भरिपूर्ण काठमाडौँको जनजीवनलाई झल्काउने तस्बिरलाई पुस्तकाकार दिएर ग्रन्थकारले दुई देशबीचको सम्बन्धमा प्रगाढ बनाउन सहयोग पु¥याएको विचार व्यक्त गर्नुभयो ।
लेखक अशरफले पुस्तकमा परम्परागत व्यापार, धार्मिक गतिविधि, आधुनिक पर्यटन र पर्वतारोहणसम्बन्धी तस्बिरहरु समेटिएको बताउनुभयो ।
भारतको विज्डम ट्रीले प्रकाशनमा ल्याएको उक्त पुस्तकको बिक्रीबाट सङ्कलित रकम उपत्यकाको पर्यटकीय स्मारकको पुनःनिर्माणका लागि सहयोग स्वरुप प्रदान गरिने प्रकाशकले जनाएको छ । रासस
No comments:
Post a Comment