नयाँ बर्षमा राष्ट्रपति र उपराष्ट्रपतिको शुभकामना

काठमाडौ, १५ कात्तिक । नेपाल सम्वत् ११३७ प्रारम्भ भएको सुखद अवसरमा राष्ट्रपति, उपराष्ट्रपति र नेपाली काँग्रेसका सभापतिले बेग्लाबेग्लै शुभकामना सन्देश जारी गर्दै नेपाल सम्वत् ‘जागरण कालको इतिहास’ र ‘संस्कृतिको एक जीवन्त धरोहर’ भएको बताउनुभएको छ ।
राष्ट्रपति विद्यादेवी भण्डारीले दिनुभएको सन्देशमा सांस्कृतिक र ऐतिहासिक महत्व बोकेको नेपाल सम्वत् ११३७ को पावन अवसरमा स्वदेश तथा विदेशमा रहनुभएका सम्पूर्ण नेपाली दाजुभाइ तथा दिदीबहिनीको सुख, शान्ति, समृद्धि र उत्तरोत्तर प्रगतिको कामना गर्नुभएको छ । उहाँले नेपालीहरूको आफ्नै मौलिक सम्वत्को रुपमा रहेको नेपाल सम्वत्ले सबै नेपालीमा सहिष्णुता, सामाजिक एकता र आपसी सद्भाव अभिवृद्धि गर्नुका साथै भाइचाराको भावना समेत सुदृढ गर्न योगदान दिने आशा व्यक्त गर्नुभएको छ ।
त्यस्तै उपराष्ट्रपति नन्दबहादुर पुनले संविधानको तीव्र गतिमा कार्यान्वयन गर्दै बलियो राष्ट्रिय एकता र आर्थिक समृद्धिसहितका समृद्ध नेपाल निर्माण मुलुकको अहिलेको प्रमुख कार्यभार भएको बताउनुभएको छ । नेपाल सम्वत्को शुभ दिनले सबै नेपालीलाई एकताबद्ध गर्दै आपसी सहमति, सहयोग र सहकार्यको बाटोमा अघि बढ्न प्रेरणा मिलोस् भन्ने शुभकामना उपराष्ट्रपति पुनले दिनुभएको छ । नेपाली काँग्रेसका सभापति शेरबहादुर देउवाले नयाँ दिनले हरेक वर्ष हामी सबै नेपालीलाई यसका प्रणेता शंखधर साख्वाःको योगदानलाई सम्झाउँने गरेको बताउनु भएको छ ।

No related posts.