पाल्पा, १५ मङ्सिर । पाल्पाको कोलडाँडामा रहेको सत्यवती मन्दिरमा रु आठलाख भेटी सङ्कलन भएको छ ।
गत कात्तिक २८, २९ र ३० गते कात्तिक पूर्णिमाका अवसरमा लागेको सत्यवती मेलाका अवसरमा यसवर्ष रु आठलाख चारहजार भेटी सङ्कलन भएको हो ।
यसवर्ष यहाँ एक हजार जति बोका, बाख्रा, पाठापाठी, परेवा र हाँसको बलि दिइएको छ भने झन्डै ७० हजार जति दर्शनार्थीले मेला अवलोकन गरेको सत्यवती मन्दिर व्यवस्थापन समितिका अध्यक्ष सुनबीर गाहाले बताउनुभयो ।
गतवर्ष यस मन्दिरमा पाँचलाख बराबरको भेटी सङ्कलन र ३० हजार जति दर्शनार्थीले मेला अवलोकन गरेका थिए । यसवर्ष तिथिका हिसाबले पूर्णिमा तिथि कात्तिक महिनामै परेकाले शुभ हुने विश्वासका कारण गतवर्षको तुलनामा धेरै दर्शनार्थीले मेला अवलोकन गरेको स्थानीय धु्रवप्रसाद पङ्गेनीले बताउनुभयो ।
मन्दिरमा सङ्कलित भेटी मन्दिर मर्मत, खानेपानी, मन्दिर सरसफाई, पुजाआजा व्यवस्थापन, मन्दिरसम्म पुग्ने बाटो मर्मतमा खर्च गरिने समितिले जनाएको छ । रासस
No comments:
Post a Comment