फलेवास (पर्वत), ८ मङ्सिर । मर्मतका लागि बन्द गरिएको मुलुककै पहिलो केबुलकार मोडेलको कुश्मा–बलेवा यान्त्रिक पुल झन्डै दुई साता पछि पुनः सञ्चालन भएको छ ।
प्राविधिक समस्या देखिएका कारण गत कात्तिक २७ गतेदेखि बन्द भएको यान्त्रिक पुल मर्मतपछि आज बिहानबाट सञ्चालनमा आएको हो ।
पुलको लठ्ठामा समस्या देखिएपछि बन्द गरिएको सेवा मर्मत पछि सुचारु गरिएको कुश्मा बलेवा यान्त्रिक पुल लिमिटेडका अध्यक्ष होमनारायण श्रेष्ठले जानकारी दिनुभयो ।
“भारतबाट प्राविधिक झिकाएर मर्मत गरेपछि सेवा सुचारु भएको हो ।” उहाँले भन्नुभयो “मङ्गलबार साँझ परीक्षण गरिएकाले आज बिहानदेखि नियमित रुपमा सेवा सञ्चालन भएको हो ।
पुल लामो समयसम्म सञ्चालन भइरहँदा लठ्ठामा समस्या देखिएका कारण यात्रुलाई सम्भावित खतरा हुन नदिन सेवा बन्द गरिएको थियो । यान्त्रिक पुल बन्द हुँदा आन्तरिक तथा बाह्य पर्यटक समस्यामा परेका थिए ।
उक्त पुलबाट अहिले दैनिक सयौँको सङ्ख्यामा यात्रु आवतजावत गर्दै आइरहेका छन् । विगत पाँच वर्ष अघि मुलुकमै पहिलोपटक केबलकार मोडेलमा निर्माण गरिएको कुश्मा–बलेवा यान्त्रिक पुल सञ्चालनमा आएपछि दुई घन्टाको पैदलयात्रा चार मिनेटमै छोटिएको छ ।
उक्त पुलमा बागलुङ र पर्वतका गरी ४३६ जनाको सेयर रहेको छ । दुईवटा यान्त्रिक कार जडान भएको उक्त पुलमा एउटा कारमा आठ जना अट्न सक्ने क्षमता छ । दुवैतर्फ गरेर एकपटकमा १६ जना आवतजावत गर्न सकिन्छ । करिब रु पाँच करोडको लागतमा निर्मित उक्त पुलबाट यात्रा गर्नका लागि एकतर्फी भाडा रु १०० तोकिएको छ भने बागलुङ जिल्लाको बलेवा क्षेत्रका बासिन्दाका लागि रु ७५ तोकिएको छ ।
आर्थिक वर्षमा रु एक करोड मुनाफा आर्जन भएको सो यान्त्रिक पुल लिमिटेडले सेयर सदस्यलाई २० प्रतिशत लाभांस समेत वितरण गरेकोे लिमिटेडका सचिव केदारनाथ शर्माले जानकारी दिनुभयो । रासस
No comments:
Post a Comment