काठमाडौँ, १७ चैत । उद्योगमन्त्री नवीन्द्रराज जोशीसँग आज मन्त्रालयमा नेपालका लागि अष्ट्रेलियाका राजदूत ग्लेन डारेन ह्वाइटले भेट गर्नुभयो ।
भेटमा मन्त्री जोशीले लघुउद्यम विकास कार्यक्रमले ग्रामीण क्षेत्रमा ७० हजारभन्दा बढी लघु उद्यमी तयार भएको बताउँदै उद्यमशीलता विकासमा अष्ट्रेलियन सहयोगका लागि धन्यवाद व्यक्त गर्नुभयो ।
अन्तर्राष्ट्रिय लगानी सम्मेलनमा व्यक्त आशयपत्रलाई लगानीमा परिणत गर्न सरकारले विभिन्न समिति बनाएर कार्य गरिरहेको उल्लेख गर्दै उहाँले नीतिगत सुधार तथा उद्योग मन्त्रालय र मन्त्रालयअन्तर्गतका विभागबाट प्रदान गरिने प्रशासनिक सेवालाई चुस्तदुरुस्त र पारदर्शी बनाएको बताउनुभयो ।
मन्त्री जोशीले नेपाली उत्पादनको अष्ट्रेलियामा बजार विस्तारका लागि सहयोग गर्न आग्रह गर्दै नेपालमा वैदेशिक लगानीको वातावरण बन्दै गएको जानकारी दिनुभयो ।
सो अवसरमा राजदूत ह्वाइटले नेपालले नीतिगत सुधार गरी लगानीका लागि सहजता बनाएकोमा खुसी व्यक्त गर्दै नेपालको विकास प्रयासमा अष्ट्रेलियन सहयोगको निरन्तरता रहिरहने प्रतिबद्धता व्यक्त गर्नुभयो ।
दार्चुला जिल्लामा उत्पादित अग्र्यानिक महको विश्व बजारमा राम्रो भविष्य भएकाले त्यसतर्फ ध्यान दिन उहाँले सुझावपनि दिनुभयो । रासस
No comments:
Post a Comment