काठमाडौँ, १५ वैशाख । वनमा हुने आगलागीका घटना गत वर्षको तुलनामा यस वर्ष कमी आएको छ । मानिसबाट हुने हेलचेक्र्याईं र गर्मीसँगै आउने हावाहुरीका कारण गत वर्ष धेरै ठाउँमा लागेको भएपनि यस वर्ष भने कमी आएको वन विभागले जनाएको छ ।
विभागका उपसचिव मोहनराज काफ्लेले यस वर्ष सिन्धुली, उदयपुर, अर्घाखाँची, तेह्रथुम, बाँके बर्दियालगायत जिल्लाका एकहजार पाँचसय हेक्टर वनमा आगलागी भएको उहाँले बताउनुभयो । उहाँले भन्नुभयो, “यो वर्ष समयमा पानी परेका कारण वनमा आगलागीको घटनामा कमी आएको हो ।”
उपसचिव काफ्लेले गत वर्ष तीनलाख ५० हजार हेक्टर वनमा आगलागी भएको बताउनुभयो । आगलागी भएका वनमध्ये सामुदायिक र साझेदारी वन धेरै छन् । उहाँले यस वर्ष चैतको पहिलो हप्ता नै डढेलो नियन्त्रणसम्बन्धी सप्ताह मनाएको कारण पनि वनमा थोरै आगलागी भएको स्पष्ट पार्नुभयो ।
कुल आगलागी हुनेमध्ये ८३ प्रतिशत चैत र वैशाखमा हुने गरेको विभागले जनाएको छ । यो वर्ष वन आगलागीमा मानवीय क्षति भने भएको छैन । रासस
No comments:
Post a Comment