विराटनगर, ५ वैशाख । नेपाली काँग्रेसका नेता रामचन्द्र पौडेलले मुलुकमा निर्वाचनको वातावरण बन्दै गइरहेको बताउनुभएको छ ।
विराटनगर विमानस्थलमा आज सञ्चारकर्मीसँग कुराकानी गर्दै नेता पौडेलले हिमाल, पहाड र तराई सबैतिर निर्वाचनमय वातावरण भएकाले सबैलाई मिलाएर एकै चरणमा निर्वाचन गर्ने पक्षमा नेपाली काँग्रेस रहेको स्पष्ट पार्नुभयो ।
लामो समयसम्म स्थानीय तहको निर्वाचन नहुँदा मुलुकले गति लिन नसकेको भन्दै नेता पौंडेलले अब कुनै पनि बहानामा निर्वाचनको मिति सार्न नहुने सुझाव दिनुभयो ।
मधेसी मोर्चालाई निर्वाचनमा सहभागी हुन आग्रह गर्दै उहाँले भन्नुभयो,“आन्दोलनले समस्याको समाधान हँदैन, नेपाली जनताले निर्वाचन चाहेकाले जनताको भावना बुझेर मोर्चाले निर्वाचनमा सहभागी हुनुपर्दछ ।”
महामन्त्री शशाङ्क कोइरालाले मधेसी मोर्चा निर्वाचनमा सहभागी हुन्छ भने हप्ता, दस दिन निर्वाचन सार्न सकिने सम्भावना व्यक्त गर्नुभयो ।
स्थानीय तहको निर्वाचनलाई सार्थक बनाउन पनि मधेसी मोर्चालाई निर्वाचनमा सहभागी गराउनुपर्ने विषयमा जोड दिँदै उहाँले हिमाल, पहाड र तराई–मधेस सबै जनताको भावनाअनुसार एकै चरणमा निर्वाचन हुनुपर्ने बताउनुभयो ।
उहाँले संविधान संशोधन प्रस्तावमा भएको असहमतिका बारेमा मोर्चासँग वार्ता गरेर तत्काल मुलुकलाई राजनीतिक निकास दिनुपर्ने धारणा प्रकट गर्दै उहाँले भन्नुभयो, “मोर्चाले पनि मुलुकलाई निकास दिन सीमाङ्कनको विषयलाई स्थानीय निर्वाचनपछि आयोगमार्फत टुङ्गो लगाउने गरी सहमति खोज्नुपर्दछ ।”
उहाँले तीनै तहको निर्वाचन समयमा नै गराउन समय छोटो भएपनि राजनीतिक दलहरूमा इच्छाशक्ति भए निर्वाचन सफल हुने विश्वास व्यक्त गर्नुभयो । रासस
No related posts.
No comments:
Post a Comment