धनगढी, ९ असार । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले माओवादी आन्दोलन र शान्ति प्रक्रियामा माओवादीले खेलेको भूमिकाकै कारण मुलुक सङ्घीय लोकतान्त्रिक गणतन्त्रमा प्रवेश गर्न सफल भएको बताउनुभएको छ ।
धनगढी उपमहानगरपालिकाको फूलबारीमा आज आयोजित चुनावी सभालाई सम्बोधन गर्दै अध्यक्ष प्रचण्डले गणतन्त्र, संविधानसभामार्फत संविधान निर्माण, धर्मनिरपेक्षता, समानुपातिकता, समावेशिता जस्ता महत्वपूर्ण राजनीतिक उपलब्धि भएर मुलुक नयाँ संरचनानुसार निर्वाचनको चरणमा आइपुगेको बताउनुभयो ।
उहाँले नेपाली काँग्रेस र नेकपा(एमाले)ले पुरानै संरचनामा निर्वाचन गराउन खोजे पनि आफू प्रधानमन्त्री भएका बेला लिएको अडानका कारण मात्रै स्थानीय तहको चुनाव सम्भव भएको जिकिर गर्नुभयो । पूर्वप्रधानमन्त्री प्रचण्डले भन्नुभयो–“साबिकको गाविसको चुनाव गराइएको भए सिंहदरबारको अधिकार गाउँ तहसम्म पुग्ने थिएन ।”
उहाँले धनगढी उपमहानगरपालिका र गोदावरी नगरपालिकालाई जोडेर महानगरपालिका बनाउन सकिने र त्यसका लागि दृष्टिकोण भएको नेतृत्व आवश्यक रहेको बताउनुभयो । उहाँले भन्नुभयो, “केही समय मेहनत गरे धनगढी–अत्तरियालाई जोडेर सुदूरपश्चिमकै नमुना महानगरपालिका बनाउन सकिने सपना मैले देखेको छु ।”
उहाँले पहिलो पटक आफू प्रधानमन्त्री भएका बेला सुदूरपश्चिम विश्वविद्यालय स्थापना गरेको र अहिले प्रधानमन्त्री हुँदा पनि पञ्चेश्वर परियोजना, महाकालीमा पक्की पुल, सुख्खा बन्दगाह, पश्चिम सेती, हुलाकी मार्गजस्ता ठूला परियोजनाको निर्माण प्रक्रिया अगाडि बढाएको बताउनुभयो ।
सभामा नेकपा (माओवादी केन्द्र)का तर्फबाट उपमहानगरपालिका प्रमुख र उपप्रमुखका प्रत्याशी क्रमशः रामसमझ राना थारु र शान्ति अधिकारी क्षेत्रीलगायतले पनि बोल्नुभएको थियो । रासस
No related posts.
No comments:
Post a Comment