निर्वाचन आचारसंहिताको पूर्ण पालना

सिन्धुली। नजिकिँदै गरेको प्रदेशसभा र प्रतिनिधिसभाको निर्वाचनअन्तर्गत अहिलेसम्म आचारसंहिता पूर्ण पालना भएको पाइएको छ ।

स्वच्छ, स्वतन्त्र, निष्पक्ष, पारदर्शी र विश्वसनीय ढङ्गबाट सम्पन्न गर्ने उद्देश्यका साथ निर्वाचन आयोगले निर्वाचन आचारसंहिता २०७४ जारी गरेको थियो । दलहरुले चुनावी प्रचार प्रसारलाई तीव्रता दिइरहँदा अहिलेसम्म कहीँ कतै आचारसंहिता उल्लङ्घन नगरेको पाइएको जिल्ला निर्वाचन कार्यालयका निर्वाचन अधिकारी रमेशकुमार जोशीले जानकारी दिनुभयो ।

दल, सामाजिक संघसंस्था, कर्मचारी, सञ्चारमाध्यमलगायत सबैले आचारसंहिताको पूर्ण पालना गरेको उहाँले बताउनुभयो । ण्निर्वाचन आचारसंहिताका बारेमा जिल्लाका सरोकारवाला निकायले निर्वाचनको समय शुरु हुनु अगावै जानकारी तथा अभिमुखीकरण गरेका थिए । दल तथा उम्मेदवारले चुनावी प्रचार प्रसार र चुनावी सभालाई सम्बोधन गर्ने कार्य तीव्र गतिका साथ सञ्चालन गरे पनि शान्त तथा मर्यादित तवरले गरेका छन् ।

दुई नगरपालिका र सात गाउँपालिका रहेको जिल्लामा दलले गर्ने चुनावी प्रचार प्रसार तथा निर्वाचनसम्बन्धी गतिविधिलाई नजिकबाट नियाँलिरहेको निर्वाचन अधिकारी जोशीले बताउनुभयो । उहाँका अनुसार निर्वाचन आयोगले सहसचिवद्वय बैकुण्ठ अर्याल र वेदबहादुर कार्कीलाई अनुगमन अधिकृतका रुपमा खटाएको छ ।

हालसम्म जिल्लाको कमला खोँच, मरिण, तीनपाटन, महाभारत क्षेत्र लगायतका स्थानमा स्थलगत अनुगमन गरिएको आयोगले जनाएको छ । उम्मेदवारले निर्वाचन चिह्न अंकित ज्याकेट, कमिज, टी–सर्ट, टोपी, गम्छा वा अन्य कुनै किसिमको पहिरन वा स्टिकर, लोगो, झोला, ट्याटु जस्ता साङ्केतिक सामग्री उत्पादन गर्न, प्रयोग गर्न, बिक्री गर्न वा प्रदर्शन गर्न वा गराउन नहुने, निर्वाचनसम्बन्धी प्रचार–प्रसारका लागि धार्मिक, सांस्कृतिक, पुरातात्विक, ऐतिहासिकस्थल वा सार्वजनिक संस्थाको भवन, स्मारक, पर्खाल, सडक, खम्बा वा संरचनालगायत कुनै पनि सार्वजनिक स्थानमा पर्चा टाँस्न वा टाँस्न लगाउन वा लेख्न वा लेख्न लगाउन नहुने, चुनावी कार्यक्रमका बारेमा स्थानीय प्रशासन र प्रहरीलाई समय, मिति, मार्ग र स्थानका बारेमा कम्तीमा ४८ घण्टा अगावै जानकारी गराउनुपर्ने, जुलुस, आमसभा, ¥याली, बैठक, भेला वा प्रचार प्रसारका कार्यक्रम बिहान ८ देखि साँझ ७ बजेसम्म मात्र गर्नुपर्ने, आमसभा गरेको स्थल र समयमाबाहेक अन्य स्थल र समयमा माइक तथा लाउडस्पिकर र ध्वनि उत्पन्न गर्ने अन्य यन्त्र प्रयोग गर्न नहुने लगायतका आचारसंहिता जारी गरेको छ ।