गाईघाट (उदयपुर), १४ कात्तिक । यस पटकको सिजनमा उदयपुर जिल्लाको पश्चिमी पहाडी क्षेत्रका गाविसमा अदुवा खेती उत्पादन निकै राम्रो भएपछि यसक्षेत्रका व्यावसायिक अदुवा उत्पादक कृषक निकै उत्साहित भएका छन् ।
जिल्लाको पश्चिमी पहाडी क्षेत्रको सिरीसे गाविस, हर्देनी, मयङ्खु, बाहुनीटार, कटारी, रिस्कु, सोरुङ्छबीसे क्षेत्रमा व्यावसायिक अदुवा खेती हुँदै आएको छ ।
यसपटक व्यावसायिकरुपमा गरिएका अदुवा खेती राम्रो उत्पादन भएको कारण आपूmहरु निकै उत्साहित भएको हर्देनी गाविस–९ बेतिनीका स्थानीय कृषक दिव्यराज राउतले बताउनुभयो ।
गत वर्षको तुलनामा यसपटक अदुवाको उत्पादनको अवस्था हेर्दा राम्रो देखिएको कारण यसपटक अदुवा बिक्रीबाट राम्रो आम्दानी हुने अपेक्षा आपूmहरुको रहेको लेखानीका स्थानीय हर्कबहादुर मगर बताउनुहुन्छ ।
मगर भन्नु हुन्छ, “गत वर्षभन्दा यसपटक अदुवाको बोट पनि राम्ररी फष्टाएर आएको छ, अनि फेदमा फलपनि राम्रो लागेको कारण उत्पादन उत्साहजनक देखिएको छ ।”
कटारी रिस्कु–७ का विष्णु दनुवार भन्छन्, “यस पटक गत वर्षको तुलनामा अदुवा दोब्बर राम्रो उत्पादन भएको छ, तर अदुवा बिक्री गर्न बजार सहज तरिकाले पाउन सकिने हो की हैन भन्ने चिन्ता लागेको छ ।”
जिल्लाको पश्चिमी क्षेत्रमा अदुवा राम्ररी उत्पादन हुने गरेपनि वर्षेनी अदुवाले उचित बजार भने पाउन नसकेको स्थानीय कृषकको गुनासो रहेको छ ।
अहिले स्थानीय बजारमा अदुवाको मुल्य प्रतिकिलो ६० देखि ८० रुपैयाँसम्म रहेको कृषक बताउँछन् । अदुवा उत्पादन हुने गाउँघरमा भने रु ४० प्रतिकिलो अदुवा रहेको रिस्कु–७ का कुमार मगरले बताउनुभयो ।
जिल्लाको पश्चिमी क्षेत्रमा वर्षेनी झण्डै चार हजार मेट्रिकटनभन्दा बढी अदुवा उत्पादन हुने गरेको जिल्ला कृषि विकास कार्यालय उदयपुरले जनाएको छ ।
यस क्षेत्रका एक घरका अदुवा उत्पादक कृषकले कम्तिमा पनि रु पचास हजारदेखि तीन लाखसम्मको वर्षेनी अदुवा बिक्री गर्ने गरेको सिरीसे गाविस–७ का स्थानीय पुर्णबहादुर मगर बताउनुहुन्छ ।
यस क्षेत्रमा उत्पादन हुने अदुवा स्थानीय कटारी बजार हुँदै खरीद कर्ताले सप्तरी, सिरहा, धनुषा र सुनसरी मोरङसम्म लगेर बिक्री गर्ने गरेका छन् । रासस
–––––
No comments:
Post a Comment