भूमिसम्बन्धी १७ मुद्दा

भद्रपुर, १४ पुस । भूमिसुधार तथा व्यवस्थामन्त्री रामकुमार सुब्बाले भूमिसँग नेपाली जनताको सम्बन्ध निकै संवेदनशील रहेकाले मालपोतमा कार्यरत कर्मचारीले काममा ध्यान दिनुपर्ने निर्देशन दिनुभएको छ ।

मालपोत कार्यालय भद्रपुर, झापाको आज निरीक्षण गर्दै मन्त्री सुब्बाले कार्यालयसँग सम्पत्तिका रुपमा रहेको जग्गाको स्रेस्ता र मोठलाई चुस्त एवम् दुरुस्त राख्न निर्देशन दिनुभयो ।

सो अवसरमा मालपोत कार्यालयका प्रमुख विजय पौडेलले कार्यालयको भवन नयाँ एवम् व्यवस्थित भए पनि आर्थिक स्रोतको ढाँचा पुरानै भएकाले काममा समस्या भइरहेको जानकारी दिनुभयो ।

उहाँले अहिले पाँच महिनामा रु छ करोड ८५ लाख राजस्व उठेको जानकारी दिँदै कार्यालयको सुरक्षामा चौकीदारको समस्या रहेको र सवारी साधन नभएकाले जनताको काममा पनि समस्या भइरहेको बताउनुभयो ।

भूमिसुधार कार्यालय, भद्रपुरका प्रमुख भूपाल निरौलाले आफ्नो कार्यालयमा भूमिसम्बन्धी १७ मात्र मुद्दा रहेको जानकारी दिनुभयो । रासस