काठमाडौँ, २४ मङ्सिर । प्रहरी महानिरीक्षक उपेन्द्रकान्त अर्यालले अपराध अनुसन्धान जति धेरै वैज्ञानिक र सवल बनाउन सक्यो प्रहरीले त्यति नै नागरिकको अपेक्षाबमोजिम परिणाम दिन सक्ने बताउनुभएको छ ।
‘वस्तुनिष्ठ अपराध अनुसन्धान र मानव अधिकारको सम्मान’ भन्ने नारासहित ६० आँै अपराध अनुसन्धान दिवसका अवसरमा आज यहाँ आयोजित कार्यक्रममा उहाँले भन्नुभयो, “यो क्षेत्र सबैको प्राथमिकतामा परेन भने कानुनी शासन र मानव अधिकारको प्रत्याभूति गर्न पनि सकिदैन ।”
उहाँले हाल अपराध डिजिटल र अपराधी अत्याधुनिक प्रविधिले सम्पन्न भइसकेको उल्लेख गर्दै प्रहरीले पनि डिजिटल साधनस्रोत र दक्षता अभिवृद्धि गरेमा मात्र अपराध नियन्त्रण गर्न सकिने बताउनुभयो ।
सो अवसरमा महानिरीक्षक अर्यालले प्रहरी प्रधान कार्यालय अपराध अनुसन्धान विभागमा स्थापना गरिएको डिजिटल फरेन्सिक ल्याबको उद्घाटन गर्नुभयो ।
उक्त अवसरमा उहाँले विभागद्वारा प्रकाशित सिआइडी पत्रिकाको विमोचन गर्नुका साथै अपराध अनुसन्धानतर्फ उत्कृष्ट काम गर्ने प्रहरी कर्मचारी तथा कार्यालयलाई सम्मान गर्नुभयो ।
सम्मानित हुनेमा प्रहरी उपरीक्षक योगबहादुर पाल, प्रहरी नायब निरीक्षक भुवनबाबु खड्का, ललितबहादुर तामाङ र रामबहादुर क्षेत्री, प्रहरी हवल्दारद्वय प्रभु कुहार, प्रेमप्रसाद शर्मा , प्रहरी जवान सुरेन्द्र कार्की र प्रहरी कार्यालयमा इलाका प्रहरी कार्यालय सिमरा रहेका छन् ।
कार्यक्रममा गृह मन्त्रालयका सहसचिव चक्रबहादुर बुढाले विश्वव्यापीकरण र विज्ञानप्रविधिको विकासले अपराधमा आएको नयाँ प्रवृत्तिसँग जुध्नसक्ने गरी समयमा नै क्षमता विकास गर्न सकिएन भने अपेक्षित सफलता पाउन नसकिनेतर्फ सचेत हुनुपर्ने आवश्यक्ता औँल्याउनुभयो ।
सर्वोच्च अदालतका फैसला कार्यान्वयन निर्देशनालयका निर्देशक महेन्द्र उपाध्यायले नेपाल प्रहरीको सक्रियताका कारण फैसला कार्यान्वयन प्रभावकारी भएको उल्लेख गर्नुभयो । रासस
No comments:
Post a Comment