प्रहरीद्धारा एक करोडको छात्रवृत्ति कोष स्थापना

काठमाडौँ, १७ मङ्सिर । प्रकोप पीडित प्रहरी कर्मचारीका सन्ततीको उच्च शिक्षाका लागि नेपाल प्रहरीले रु एक करोड आठ लाख त्रियासी हजार नौसय पाँच राशिको छात्रवृत्ति कोष स्थापना गर्ने भएको छ ।

प्रहरी प्रधान कार्यालयमा आज बसेको बैठकले उक्त राशिको ‘प्रकोप पीडित प्रहरी सन्तती छात्रवृत्ति अक्षय कोष” स्थापना गर्ने निर्णय गरेको हो ।

गत वैशाख १२ गते गएको विनाशकारी भुकम्प पीडितका लागि प्रधानमन्त्री दैवी प्रकोप राहत कोषमार्फत नेपाल प्रहरीका कर्मचारीको तर्फबाट आर्थिक सहायता गर्न सङ्कलित रकममध्ये रु १० करोड १११ बुझाई बाँकी रहेको उक्त रकमबाट अक्षयकोष स्थापना गर्ने निर्णय भएको प्रहरीले जनाएको छ ।

कोष सञ्चालनका लागि मापदण्डसहितको कार्यवधि बनाई पीडित प्रहरीको सन्ततीहरूको उच्च शिक्षासम्मका लागि छात्रवृत्ति प्रदान गरिनेछ । रासस