काठमाडौँ, १९ मङ्सिर । केही सातादेखि निरन्तर शिथिलता आएको पूँजीबजारमा यो साता उत्साह मिलेको छ ।
निरन्तरको बन्द र नाकाबन्दीमा सुधार आउने खबरले लगानीकर्ता उत्साही हुँदा बजारमा सकारात्मक प्रभाव परेको हो ।
साताको नेप्से परिसूचक निरन्तर ओरालोपछि यस साता पहिलो दिनको तुलनामा ५०.१७ अङ्कले बढेको नेपाल स्टक एक्सचेन्जले जनाएको छ ।
गत साता परिसूचक पहिलो दिनको तुलनामा २७.३७ अङ््कले घटेको थियो । गत साता अन्तिम दिन एक हजार ४४.०१ अङ्कमा पुगेको नेप्से अन्तिम दिन एक हजार ७२.९४ अङ्कमा पुग्न सफल भएको हो ।
नेपाल स्टक एक्सचेन्जमा १४७ कम्पनीका १० हजार ८६३ कारोबारबाट रु एक अर्ब ४६ करोड दुई लाख ५० हजार बराबरका २८ लाख ६३ हजार ३० कित्ता सेयर खरिद बिक्री भएका छन् । कारोबार रकम गत साताको भन्दा १७.७१ प्रतिशत बढी हो ।
गत साता १५० कम्पनीका १२ हजार ६१५ कारोबारबाट रु एक अर्ब २४ करोड १२ लाख २० हजार बराबरका २४ लाख ३६ हजार छ सय ३० कित्ता सेयर खरिद बिक्री भएका थिए ।
यसैगरी समूहगत परिसूचकको उतारचढावमा यो साता वाणिज्य बैंक ५९.०७, विकास बैंक ४७.७१, वित्तको ३.०२, होटल २५.५१, जलविद्युत् ५८.४३, बीमा २४८.७६ र अन्य समूहको परिसूचकमा ३.७५ अङ्कले वृद्धि भयो भने उत्पादनमूलक एवम् व्यापार समूहमा कुनै पनि परिवर्तन नभएको उल्लेख छ ।
‘क’ वर्गका कम्पनीका कारोबार मापन गर्ने सेन्सेटिभ इन्डेक्स पहिलो दिनको तुलनामा ११ अङ्कले बढेर २३१.७४ अङ्कमा आइपुगेको छ ।
यस साता कारोबार रकमको आधारमा हिमालयन बैंक अग्रस्थानमा छ । त्यसैगरी कारोबार भएको सेयर सङ्ख्याको आधारमा नबिल ब्यालेन्स फन्ड १ अग्रस्थानमा छ । त्यसैगरी कारोबार सङ्ख्याको आधारमा अपी पावर कम्पनी अग्रस्थानमा छ ।
यस साता नेपाल स्टक एक्सचेन्जको कारोबार कक्ष नियमित कारोबारका लागि पाँच दिन खुला रह्यो । यस साता पनि ऋणपत्रतर्फ संस्थागत तथा सरकारी ऋणपत्रहरुको कुनै पनि कारोबार भएन । रासस
–––––––००
No comments:
Post a Comment