पहुँच मार्ग निर्माण अलपत्र

जाजरकोट, १४ पुस । जिल्लामा बन्न लागेको राष्ट्रिय गौरवको नलसिंहगाड जलविद्युत् आयोजनाको पहुँच मार्ग जोड्ने सडकको काम अलपत्र परेको छ ।

निर्माणको जिम्मा लिएका ठेकेदारले कामै नगरेपछि पहुँच मार्ग जोड्ने सडक निर्माण अलपत्र परेको हो । सडक निर्माणको जिम्मा लिएको वर्षदिन बितिसक्दा पनि निर्माण कम्पनीले काम नै सुरु गरेको छैन । आयोजनाको लहँ– ६ कालिमाटीदेखि सक्ला– १ लैखमको अधेरी खोलासम्मको १० दशमलब ८ किलोमिटर सडक निर्माणको काम रोकिएको छ ।

तीन वर्षभित्रमा निर्माण सम्पन्न गर्ने गरी रु ४४ करोड लागतको उक्त ठेक्का लामा, खड्का कृष्ण, गाल्वा जेभी, बुद्धनगर, काठमाडौँ निर्माण कम्पनीका प्रोप्राइटर रत्नबहादुर खड्काले घटाघटमा रु २२ करोडमा निर्माणको जिम्मा लिएका हुन् । तर ठेक्का सम्झौता गरेको वर्ष दिन बितिसक्दा पनि उनले निर्माण स्थलमा नटेकेको स्थानीयवासीको आरोप छ ।

निर्माण व्यवसायी खड्काले भूकम्प र भारतको नाकाबन्दीका कारण काममा ढिलाइ भएको बताउनुभयो । इन्धन अभावले कामलाई अगाडि बढाउन नसकेको उहाँको भनाइ छ । रासस