काठमाडौँ, ३ पुस । सामाजिक उत्तरदायीपूर्ण राज्य निर्माणका लागि श्रम पक्षीय आर्थिक नीतिको आवश्यकतामा आज यहाँ आयोजित कार्यक्रमका वक्ताले जोड दिनुभएको छ ।
नेपाल ट्रेड युनियन काँग्रेस, नेपाल वित्तीय संस्था कर्मचारी सङ्घ र फ्रेडरिक इबर्ट स्टिफ्टुङ्ले संयुक्तरुपमा आयोजना गरेको ‘नेपालको आर्थिक भविष्य’ विषयक कार्यशाला गोष्ठीका वक्ताले यस विषयमा जोड दिनुभएको हो ।
कार्यक्रममा पूर्व अर्थमन्त्री एवम् नेपाली काँग्रेसका केन्द्रीय सदस्य डा रामशरण महतले परिवर्तित राष्ट्रिय सन्दर्भमा विपीको समाजवादी नीतिलाई सान्दर्भिक रुपमा लागू गर्नुपर्ने बताउनुभयो ।
“धनी र गरिबबीचको खाडल कम गर्नका लागि उत्पादन बढाउन आवश्यक छ, उत्पादन बढाएर गरिबका लागि अत्यावश्यक सेवामा सहुलियत दिएमा यो खाडल कम गर्न सकिन्छ” – उहाँले भन्नुभयो ।
विगतमा काँग्रेसले लिएको आर्थिक नीति सान्दर्भिक भएकैले अहिलेको सङ्कटको अवस्थामा पनि आर्थिक व्यवस्था बचेको दाबी उहाँले दाबी गर्नुभयो ।
ट्रेड युनियन काँग्रेसका अध्यक्ष खिलानाथ दाहालले सामाजिक उत्तरदायीपूर्ण कल्याणकारी राज्य निर्माणका लागि रोजगारीको अवसर वृद्धि गरिनुपर्नेमा जोड दिनुभयो ।
स्टिफ्टुङ्का डा देवराज दाहालले सामाजिक उत्तरदायीपूर्ण राज्य निर्माणका लागि लोकतान्त्रिक समाजवादी नीतिको आवश्यकता औँल्याउनुभयो ।
सो अवसरमा त्रिभुवन विश्वविद्यालय अर्थशास्त्र विभागका प्रमुख डा रामप्रसाद ज्ञवालीले ‘आर्थिक उदारीकरण र लोकतान्त्रिक समाजवाद’ एवम् स्टिफ्टुङ्का डा चन्द्रदेव भट्टले ‘नेपालको सन्दर्भमा लोकतान्त्रिक समाजवाद’ विषयक कार्यपत्र प्रस्तुत गर्नुभएको छ ।
कार्यक्रममा जिफन्टका उमेश उपाध्याय, नेपाल उद्योग वाणिज्य महासङ्घका हंशराम पाण्डेलगायतका वक्ताले लोक कल्याणकारी राज्यमा श्रम क्षेत्रलाई सम्मान गर्ने संस्कारको विकास गरिनुपर्ने बताउनुभयो । रासस
No comments:
Post a Comment