काठमाडौँ, १२ पुस । भूमिसुधार तथा व्यवस्था मन्त्रालयका राज्यमन्त्री विक्रमबहादुर थापाले जनताको सेवालाई केन्द्रमा राखेर कार्य गर्न कर्मचारीलाई निर्देशन दिनुभएको छ ।
मालपोत कार्यालय, ललितपुरले आजदेखि प्रारम्भ गरेको अनलाइन सेवाको उद्घाटन गर्दै उहाँले सो सेवाले जग्गा, जमिनका कारोबारलाई अभिलेखीकरण गरी सेवाग्राहीलाई सहजता प्रदान गर्ने विश्वास व्यक्त गर्नुभयो ।
उहाँले मालपोत र नापी विभागलगायतका क्षेत्रमा राम्रो काम गर्दागर्दै पनि विभिन्न लाञ्छना र आरोप लाग्ने गरेकाले कर्मचारीलाई संवेदनशील र जनताप्रति जिम्मेवार भई सेवाको भावनाले कार्य सम्पादन गर्न आग्रह गर्नुभयो ।
भूमिसुधार मन्त्रालयका सचिव मोहनकृष्ण सापकोटाले समयअनुसार विकास भएका प्रविधिले जनशक्ति व्यवस्थापनमा सहयोग, समयको बचत, मानव जीवनमा सुगमता थप्ने हुँदा कर्मचारी पनि प्रविधिमैत्री हुनुपर्नेमा जोड दिनुभयो ।
ललितपुरका प्रमुख जिल्ला अधिकारी ऋषिराम शर्माले बढ्दो सहरीकरणसँगै पछिल्लो समयमा विकास भएको विज्ञान तथा प्रविधिको प्रयोग गरी प्रशासनिक कार्यलाई चुस्त तथा दुरुस्त बनाउनुपर्ने बताउनुभयो ।
भूमिसुभार तथा व्यवस्थापन विभागका महानिर्देशक रोहितकुमार भट्टराई, मन्त्रिपरिषद् कार्यालयका सहसचिव नारायण शर्मा दवाडीलगायतले अनलाइन सेवा तथा विद्युतीय प्रविधि सेवा भनेको सेवाग्राही र सेवाप्रदायक दुबैको हितमा रहेको बताउँदै यसलाई अन्य स्थानमा पनि विस्तार गर्दै लैजानुपर्ने सुझाव दिनुभयो ।
सो कार्यालय प्रमुख नारायण आचार्यले सेवा सञ्चालन भएको भए पनि दक्ष कर्मचारी तथा जनशक्तिको अभावले कार्यान्वयनमा चुनौती रहेको र त्यसलाई सफल बनाउन सबैको साथ सहयोगको अपेक्षा गर्नुभयो ।
नेपाल लेखापढी कानुन व्यवसायी एसोसिएसनका महासचिव सीताराम दाहालले जग्गा दर्ता, किनबेचमा आउने विभिन्न कानुनी समस्या तथा स–साना जटिलताको अन्त्य गर्न सो सेवा प्रभावकारी हुने बताउनुभयो । रासस
No comments:
Post a Comment