काठमाडौँ, २३ मङ्सिर । नेपालको विकासका अन्तर्राष्ट्रिय साझेदारले भ्रष्टाचार विरोधी गतिविधि निरन्तर सञ्चालनका साथै सत्यनिष्ठा र इमान्दारीको संस्कार प्रवद्र्धन गर्न नेपाल सरकारलाई अभिप्रेरित गरेका छन् ।
भ्रष्टाचारविरुद्धको अन्तर्राष्ट्रिय दिवसका अवसरमा यहाँस्थित संयुक्त राष्ट्रसङ्घीय कार्यालय, नर्वेली, जर्मनी, बेलायत, स्विट्जरल्याण्ड, फिनल्याण्डका राजदूतावास, एसियाली विकास बैंकलगायतले आज एक संयुक्त वक्तव्य जारी गरी भ्रष्टाचार घटाउन नेपालले उल्लेखनीय प्रगति गरे पनि अझै धेरै गर्न बाँकी रहेको जनाएका हुन् ।
भ्रष्टाचारविरुद्धको अभिसन्धिमा हस्ताक्षर तथा त्यसको अनुमोदनसँगै कानुन कार्यान्वयन एवम् अन्तर्राष्ट्रिय सहयोग प्रवद्र्धनमा नेपालले गरेका कामको सराहना गर्दै विकासका साझेदारले नेपाल सरकार, नागरिक समाज र अन्य साझेदारसँग मिलेर भ्रष्टचारविरुद्ध सघाउने प्रतिबद्धता पनि व्यक्त गरेका छन् । भ्रष्टाचार, गैरकानुनी वित्त प्रवाहबाट नेपालको आर्थिक विकास, सुशासन, राष्ट्रिय स्थायित्व र व्यवसायको वातावरणमा प्रतिकूल असर पार्नसक्ने तथा दिगो विकास प्राप्तिको लक्ष्य हासिल गर्न कठिन हुने उनीहरुले जनाएका छन् ।
एक दशकभन्दा लामो सङ्क्रमणको परिणामस्वरुप राजनीतिक अस्थिरता, कमजोर विधिको शासन र जवाफदेहिताले भ्रष्टाचार घटाउन नसकिएको र यसै वर्षको भूकम्पले विकासका उपलब्धि एवम् लक्ष्यलाई थप प्रभावित पारेको संयुक्त वक्तव्यमा उल्लेख छ । रासस
No comments:
Post a Comment