राजस्व असुलीमा कमी

भद्रपुर, १६ माघ । आन्तरिक राजस्व कार्यालय भद्रपुर झापाले चालु आर्थिक वर्षको छ महिनाको अवधिमा रु ६३ करोड ६९ लाख ६५ हजार राजस्व सङ्कलन गरेको जनाएको छ ।

कार्यालयले सो अवधिमा रु ७९ करोड १३ लाख ५६ हजार राजस्व सङ्कलन गर्ने लक्ष्य राखेकोमा रु १५ करोड ४३ लाख ९१ हजार कम राजस्व असुली गरेको हो । सङ्कलित राजस्वमा आम्दानी कर रु २८ करोड ६० लाख ८८ हजार, घरबहाल कर रु दुई करोड ६५ लाख ५३ हजार, ब्याज रु दुई करोड ६३ लाख ९९ हजार, मूल्य अभिवृद्धि कर रु २३ करोड ४० लाख ४९ हजार, अन्तः शुल्क रु चार करोड ११ लाख ४२ हजार, स्वास्थ्य कर रु एक करोड ६८ लाख ४० हजार र शिक्षा कर रु ५८ लाख ९४ हजार छन् ।
आन्तरिक राजस्व कार्यालयले सो अवधिमा लिएको लक्ष्यमा घरबहाल करमा ११६ प्रतिशत र स्वास्थ्य करमा १३७ प्रतिशत प्रगति गरेको देखाएको छ भने अन्यमा लक्ष्य प्राप्त गर्न सकेको छैन । रासस