भूकम्पपीडितलाई टहरा

भक्तपुर, १६ माघ । कमल विनायकस्थित सरस्वती विद्यागृहको चौरमा अस्थायी शिविरमा बस्दै आएका ३० भूकम्पपीडित परिवारलाई कमलविनायक– ४ चोखातेमा टहरा हस्तान्तरण गरिएको छ ।

त्रिपाल जिम्स बुद्धिस्ट सोसाइटी तथा तानिया पेरेरा एवम् परिवारको आर्थिक सहयोगमा श्रीलङ्काली भिक्षु यातिरवाजन विमलाले ३० टहरा निर्माण गरेर हस्तान्तरण गरेका हुन् ।

सरस्वती विद्यागृहको अस्थायी शिविरमा त्रिपाल र पालमा बस्न कठिन भएपछि त्यहाँ बस्दै आएका ३० घरपरिवारका लागि रु १० लाखको लागतमा टहरा निर्माण गरी स्थानान्तरण गरिएको हो ।

बौद्ध दाताले एक रोपनी सात आना जग्गा आगामी दुई वर्षका लागि रु २५ हजार वार्षिक भाडा तिरिदिएर टहरा बनाइदिएको कमल विनायक शिविर व्यवस्थापन समितिका संयोजक राजु सुवालले जानकारी दिनुभयो ।

दाताले शिविरमा बस्ने ३० जनालाई एक÷एक वटा कम्बल र चामल वितरण गरेका छन् । अतिगरिब पाँच विद्यार्थीलाई छात्रवृत्तिको व्यवस्था गरिएको तथा चारवटा सामूहिक चुलो र दुई शौचालय बनाइएको छ । आगामी एक वर्षसम्मका लागि खाद्यान्नको व्यवस्था गरिदिने आश्वासन दिएको सुवालले जानकारी दिनुभयो ।

शिविरमा कमलविनायक, गोल्मढी, इनाचो, महालक्ष्मीस्थान, दत्तात्रयलगायत ठाउँका भूकम्पपीडित बसेको समितिका सहसंयोजक रत्नमान वनमालाले जानकारी दिनुभयो । शिविरमा खानेपानी र बत्तीको अभावले गर्दा समस्या परेको बताउँदै उहाँले खानेपानीका लागि शिविरमा बस्नेसँग महिनावारी पैसा उठाइने गरिएको जानकारी दिनुभयो । बत्ती नहुँदा प्रवेशिका परीक्षा दिने विद्यार्थी मर्कामा परेका छन् ।

शिविरमा सौर्यबत्ती जोडिदिन अरु दाताको खोजी भइरहेको बताउँदै वनमालाले बत्ती नहुँदा भुस्याहा कुकरले दुःख दिने र विद्यार्थीको पढाइ प्रभावित हुने भएकाले त्यसको व्यवस्था गरिदिन नगरपालिका, सरकारी निकाय र दाताहरुलाई अनुरोध गर्नुभयो । रासस