अनियमितताको छानबिन गर्न तीन वटा उपसमिति गठन

काठमाडौ, २० पुस । राष्ट्रिय परिचयपत्र व्यवस्थापन लगायतका काममा अनियमितता भएकोभन्दै व्यवस्थापिका संसद्को सार्वजनिक लेखा समितिले तीन वटा उपसमिति गठन गरेको छ ।
समितिको आज सिंहदरबारमा बसेको बैठकले राष्ट्रिय परिचयपत्र व्यवस्थापनको बोलपत्र, सिंहदरबारभित्र बनाइएका पूर्वाधारहरुको निर्माण र भुकम्प प्रभावितहरुको सहयोगका लागि दाताहरुबाट आएको सहयोग रकम लुथरन विश्व फेडेरेशनले अनियमितता गरेको विषयमा छानविनका लागि तीन वटा उपसमिति गठन गरेको हो ।
समितिले राष्ट्रिय परिचयपत्र व्यवस्थापनको बोलपत्रमा भएको भनिएको अनियमितताको छानविनका लागि काँग्रेस सांसद् रामहरि खतिवडाको संयोजकत्वमा गठन गरेको उपसमितिमा जयदेव जोशी, भाष्कर भद्रा, डोरप्रसाद उपाध्याय र शत्रुधन महतो सदस्य रहनु भएको छ । लुथरन विश्व फेडेरेशनले भुकम्प प्रभावितको नाममा आएको १ अर्ब  ५० करोड रुपैयाँ अनियमितता गरेको सम्बन्धमा छानविनका लागि काँग्रेसकै सांसद् उषा गुरुङको संयोजकत्वमा गठन गरिएको उपसमितिमा भरत साउद, मीना पुन, डिम्पलकुमारी झा र लालेन्द्रकुमार मण्डल सदस्य रहनु भएको छ ।
सिंहदरबारभित्र पछिल्लो समयमा बनाइएका भवन र अन्य भौतिक पूर्वाधारहरुको निर्माणका सम्बनधमा भएको अनियमितता छानविनका लागि नेपाली जनता दलका सांसद् हरिचरण साहको संयोजकत्वमा दिपक खड्का, विकास लम्साल, रुपा महजृन र योगेन्द्र चौधरी सदस्य रहेको पाँच सदस्यीय उपसमिति गठन गरिएको छ । समितिले तीनवटै उपसमितिलाई एक महिनाको समय दिएको छ ।