हेटौँडा, १६ माघ । उपप्रधान तथा महिला बालबालिका तथा समाजकल्याण मन्त्री सिपी मैनालीले राष्ट्रको स्वतन्त्रता र संसदीय प्रजातन्त्रको सदृढीकरणका लागि सबै नेपालीले पहरेदारका रुपमा भूमिका निर्वाह गर्न जरुरी भएको बताउनुभएको छ ।
उहाँले नेकपा (माले) मकवानपुरद्वारा आज हेटौँडामा आयोजित जिल्लास्तरीय कार्यकर्ता भेलालाई सम्बोधन गर्दै केही दलहरुले तराईको माग पूरा गर्ने निहुँमा नाकाबन्दी गरिरहनु नेपाल र नेपालीका लागि हितकर नहुने र राष्ट्रको विखण्डनका लागि आफैँले भूमिका निर्वाह गर्न नहुनेतर्फ दलहरुले सजग हुनुपर्दछ भन्नुभयो ।
उपप्रधानमन्त्री मैनालीले तराईमा आन्दोलनरत दलहरुको मागलाई सरकार र प्रमुख दलहरुले संविधान संशोधन गरी पूरा गरिसकेको उल्लेख गर्दै केही कुरा बाँकी रहे वार्ताको माध्यमबाट पूरा गर्नेतर्फ अग्रसर हुनुपर्दछ र जनतालाई दुःख दिएर राजनीति गर्दा दलको हितमा राजनीति नहुनेतर्फ औँल्याउनुभयो ।
सो अवसरमा नेकपा (माले)का केन्द्रीय सदस्य भीमसेन महत र नेकपा (माले) अञ्चलका सचिव उपेन्द्र अधिकारीले केही दलहरुले आफ्नो स्वार्थभन्दा माथि उठेर राष्ट्र, राष्ट्रियता, प्रजातन्त्र र जनताको हितमा काम गर्नेतिर अग्रसर हुनुपर्दछ र बाह्य शक्तिको चलखेलमा लाग्नुहुँदैन नहुने बताउनुभयो । रासस
No comments:
Post a Comment