मदिरा उद्योगलाई जरिवाना

तिलोत्तमा (रुपन्देही), १७ पुस । ठूलो मात्रामा अन्तःशुल्कबिनाको मदिरा बरामद गरिएको रुपन्देहीको चिल्हियामा रहेको किसान डिस्ट्रिलरी कारबाहीमा परेको छ ।
उक्त उद्योगलाई आन्तरिक राजस्व कायार्लय भैरहवाले रु नौ लाख ८६ हजार जरिवाना तोक्दै बरामद मदिरा जफत र गाडी लिलाम आज प्रक्रियामा लगिएको प्रमुख कर अधिकृत महाराजाप्रसाद कोइरालाले जानकारी दिनुभयो । यही पुस २ गते प्रहरीले डिस्ट्रिलरीको आधिकारिक डिलर चिल्हियास्थित केडी सप्लायर्सबाट लु १ क ११२६ नंको मिनी ट्रकमा रहेको बिनास्टिकरको एक सय ३३ बाकस ७० युपीको सौफी ब्रान्डको मदिरा बरामद गरेर अनुसन्धानका लागि राजस्व कार्यालयमा पठाएको थियो ।
त्यसपछि कार्यालयले उद्योग बन्द गरेर सुरु गरेको अनुसन्धानका क्रममा उद्योगले हालसम्म खरिद गरेको मदिरा उत्पादनका लागि आवश्यक कच्चा पदार्थ स्प्रिट ६ सय ४४ एलपी लि फरक परेको र त्यसैका आधारमा जरिवाना गरिएको प्रमुख कर अधीकृत कोइरालाले बताउनुभयो । रासस