काँग्रेस प्रतिपक्षमा बस्ने होइन–पोखरेल

बागलुङ, १६ फागुन । नेकपा (एमाले)का स्थायी समिति सदस्य शङ्कर पोखरेलले काँग्रेस सरकारमा आउनुपर्ने बताउनुभएको छ ।

प्रेस चौतारी नेपाल, बागलुङले आज यहाँ आयोजना गरेको पत्रकार भेटघाटमा उहाँले संविधान निर्माणमा अगुवाइ गरेको दल संविधान कार्यान्वयनका लागि बनेको सरकारमा प्रतिपक्षी भएर बस्न मिल्दैन भन्नुभयो ।

उहाँले महाधिवेशनपछि काँग्रेस सरकारमा सहभागी हुने विश्वास व्यक्त गर्दै काँग्रेस र मधेसी मोर्चासहितको राष्ट्रिय सरकार बन्नुपर्ने तर सरकारको वर्तमान नेतृत्व भने विस्थापन हुन नहुने स्पष्ट पार्नुभयो । “अब नेपालको राजनीतिलाई विकास र समृद्धितर्फ लैजानुपर्छ, आर्थिक सामाजिक रुपान्त्रण आवश्यक छ, विकास राजनीतिको मुख्य मुद्दा बन्नुपर्छ” नेता पोखरेलले भन्नुभयो । रासस