‘सिन्धु पत्रकारिता सम्मान’ कसजुलाई

चौतारा, १७ फागुन । ‘सिन्धु पत्रकारिता सम्मान’ यस वर्ष पत्रकार सुरेश कसजुलाई प्रदान गरिएको छ ।

नेपाल पत्रकार महासङ्घ सिन्धुपाल्चोकको नवाँै साधारणसभाका अवसरमा आज यहाँ आयोजित कार्यक्रममा नेपाल पत्रकार महासङ्घका अध्यक्ष डा महेन्द्र विष्ट र केन्द्रीय कोषाध्यक्ष सूर्यमणि गौतमलगायतले उहाँलाई सो सम्मान प्रदान गर्नुभयो ।

त्यसैगरी ‘कञ्चन–ज्ञानेन्द्र स्मृति पत्रकारिता पुरस्कार’ महासङ्घ शाखा सिन्धुपाल्चोकका पूर्वाध्यक्ष पवित्रकुमार खड्का, ‘दुर्गाप्रसाद श्रेष्ठ स्मृति पत्रकारिता पुरस्कार’ सञ्चारकर्मी दीपक न्यौपाने, ‘रामप्रसाद घिमिरे स्मृति पत्रकारिता पुरस्कार’ प्रेस चौतारी नेपालका महासचिव माधव नेपाल, ‘जुगल नवोदित पत्रकारिता पुरस्कार’ किशोर बुढाथोकी र ‘सिन्धु विकास लघु उद्ममी प्रोत्साहन पुरस्कार’ नानीराम नेपाललाई प्रदान गरिएको छ । पुरस्कारको राशि जनही रु तीन हजार छ ।

त्यस्तै ‘रेडियो सिन्धु’, ‘रेडियो मेलम्ची’ र ‘जनतापत्र’ साप्ताहिक पनि पुरस्कृत भएका छन् । पत्रकार महासङ्घ शाखालाई आर्थिक सहयोग प्रदान गर्ने समाजसेवी शम्भु दाहाल र जिविस सिन्धुपाल्चोक पनि सम्मानित भएका छन् ।

कार्यक्रममा अध्यक्ष डा विष्टले राष्ट्रियस्तरको इन्स्टिच्युट स्थापना गरी पत्रकारलाई सक्षम र सबल बनाउन महासङ्घ लागिपरेको र गैह्रपत्रकारले समेत प्रेस परिचयपत्र लिई दुरुपयोग भइरहेको हुँदा महासङ्घले रोक्ने प्रयत्न गरिरहेको जानकारी दिनुभयो । रासस