काठमाडौँ, ९ फागुन । सुदूरपश्चिम क्षेत्रको समग्र विकासका लागि सरकारले नीति र योजना बनाइ कार्यक्रम ल्याउनुपर्नेमा आज यहाँ आयोजित कार्यक्रमका वक्ताले बताउनुभएको छ ।
नेपाल बुद्धिजीवी परिषद्ले आयोजना गरेको ‘सुदूरपश्चिमको समग्र विकास, सम्भावना र चुनौती’ विषयक अन्तक्र्रियामा उहाँहरुले आर्थिक विकासको मोडेल नै बनाएर अघि बढ्नुपर्ने सुझाव दिनुभयो ।
कार्यक्रमको उद्घाटन गर्दै उपप्रधानमन्त्री तथा रक्षामन्त्री भीमबहादुर रावलले नेपालमा राजनीतिक परिवर्तन भएको लामो समय बितिसक्दा पनि सुदूरपश्चिमको विकास तथा प्रगतिको ढोका नखुलेको बताउँदै सङ्घीयतामा जाँदै गरेको अहिलेको अवस्थामा त्यहाँका पीडित जनताको उत्थानका लागि सरकार तथा निजी क्षेत्रको ध्यान जानुपर्ने औँल्याउनुभयो ।
उहाँले ४६ प्रतिशत जनता गरिबीको अवस्थामा रहेको सो क्षेत्रको विकासका लागि नीतिगत तहमा सुदूर पश्चिम आयोग नै बनाएर नीति तथा योजना निर्माण गर्नुपर्नेमा जोड दिनुभयो ।
कार्यपत्र प्रस्तुत गर्दै राष्ट्रिय योजना आयोगका सदस्य डा विजय कुँवरले सुदूरपश्चिम क्षेत्र शिक्षा, स्वास्थ्य क्षेत्रमा पछि परेको तथा रोजगारी सृजना हुन नसकेकाले सो क्षेत्रको विकासका लागि सरकारले एउटा मोडेल तयार गर्नुपर्नेमा जोड दिनुभयो । अर्का कार्यपत्र प्रस्तोता डा शिवराज अधिकारीले अन्यत्र गरीवी घट्ने क्रममा रहँदा सुदुर पश्चिममा भने बढ्नेक्रममा देखिएको बताउनु भयो ।
अर्का सदस्य डा सुमित्रा अमात्यले सुदूरपश्चिमको विकास गर्नका लागि योजना आयोगले बजेटको सिलिङ बढाउन तयार रहेको चर्चा गर्नुभयो । टिप्पणीकार प्रा डा महेश दाहाल, डा मदन कोइराला, एमालेका केन्द्रीय सदस्य तथा बुद्धिजीवी फाँट इन्चार्ज तथा पूर्व राजदूत टङ्क कार्की, योजना आयोग सदस्य डा सुनिलबाबु श्रेष्ठ, अर्थ मन्त्रालयका वरिष्ठ सल्लाहकार प्रा डा गोविन्द नेपाल, तथा अन्तर्र्कृयामा सहभागी अन्य प्रा डा प्रेम कुँवर, प्रा डा रुप खडका, डा तारानिधि भटृराईलगायतका वक्ताले सुदूरपश्चिम क्षेत्रमा जलस्रोत, पर्यटन, जडीबुटी आदिको विकासको ठूलो सम्भावना रहेको औँल्याउनुभयो ।
सभापतिको आशनबाट परिषद्का अध्यक्ष डा दिनेशचन्द्र देवकोटाले सङ्घीयतामा गइसकेको वर्तमान अवस्थामा सुदूरपश्चिम क्षेत्रको विकासका लागि सरकारको ध्यान आकर्षित गर्न कार्यक्रम गरेको जानकारी दिनुभयो । रासस
No comments:
Post a Comment