वैशाख ३ गतेदेखि जनजागरण अभियान सञ्चालन गरिने

विराटगर, १८ चैत । सद्भावना पार्टीको तीनदिने राष्ट्रिय कार्यसमितिको विस्तारित बैठक तराई–मधेसमा आगामी वैशाख ३ गतेदेखि सप्ताहव्यापी जनजागरण अभियान सञ्चालन गर्ने लगायतका आठबुँदे निर्णय गर्दै आज यहाँ सम्पन्न भएको छ ।

बैठकले भावी रणनीति एवम् कार्यदिशा शीर्षकसहितको पाँच पृष्ठ राजनीतिक प्रस्ताव परिमार्जन गरी पारित गरेको छ । बैठकले मधेस आन्दोलनका क्रममा आन्दोलनकारीमाथि लगाइएका मुद्दा अविलम्ब फिर्ता लिन, पक्राउ गरिएका कार्यकर्तालाई रिहा गर्न, हड्तालको अवधिभरको राजस्व छुट, कर मिनाहा, ब्याज र विलम्ब शुल्क छुट गर्न तथा आन्दोलनका क्रममा मृत्यु भएकाहरुलाई तत्काल सहिद घोषणा गर्न माग गरेको छ ।
बैठकले विसं २०७३ चैतभित्र पार्टीको छैँटौँ राष्ट्रिय महाधिवेशन गर्ने निर्णय समेत गरेको छ । रासस