दिगो विकास लक्ष्य : मस्यौदा सार्वजनिक

काठमाडौँ, १८ चैत । सरकारले दिगो विकास लक्ष्य (सन् २०१६–२०३०)को प्रारम्भिक (मस्यौदा) प्रतिवेदन आज यहाँ सार्वजनिक गरेको छ ।

यहाँ आयोजित पत्रकार सम्मेलनमा राष्ट्रिय योजना आयोगका उपाध्यक्ष डा युवराज खतिवडाले संयुक्त राष्ट्रसङ्घीय विकास कार्यक्रम (युएनडिपी)को सहयोगमा ल्याइएका दिगो विकासका १७ बुँदे योजना सार्वजनिक गर्नुभयो । सोअन्तर्गत गरिबी र भोकमरी अन्त्य गर्ने, दिगो कृषिको प्रवद्र्धन गर्ने, जनताको स्वस्थ जीवन सुनिश्चित गर्ने, सबैका लागि समावेशी तथा गुणस्तरीय शिक्षा सुनिश्चित गर्ने र महिला सशक्तीकरण गर्दै लैङ्गिक समानता हासिल गर्ने योजना छ ।

त्यस्तै सर्वसुलभ खानेपानी र सरसफाइको दिगो व्यवस्थापन, आधुनिक ऊर्जामा सबैको पहुँच, जनताको दिगो आर्थिक वृद्धिका लागि उत्पादनमूलक रोजगारीको व्यवस्था, टिकाउ पूर्वाधार निर्माण र दिगो औद्योगिकीकरणको प्रवद्र्धन गर्ने तथा नवीन खोजलाई प्रोत्साहन गर्ने सरकारको लक्ष्य छ । देशभित्रै र देशहरुमाझ रहेको असमानतालाई न्यून गर्ने, नगर र मानव बस्तीलाई समावेशी, सुरक्षित, सबल र दिगो बनाउने, दिगो उत्पादन र उपभोगको ढाँचा सुनिश्चित गर्ने, जलवायु परिवर्तन तथा यसका प्रभावविरुद्ध लड्ने लक्ष्य सरकारले लिएको छ ।

त्यस्तै दिगो पर्यावरणीय प्रणालीको प्रयोगको संरक्षण, पुनःस्थापना र प्रवद्र्धन तथा वनको दिगो व्यवस्थापन गर्ने, मरुभूमीकरण तथा भूक्षयीकरणको रोकथाम, जैविक विविधताको क्षति रोकावट, दिगो विकासका लागि शान्तिपूर्ण र समावेशी समाजको प्रवद्र्धन, सबैलाई न्यायमा पहुँच पु¥याउने तथा विश्वव्यापी साझेदारीलाई पुनःजीवन दिने लगायत छन् । विश्वव्यापीकरण अनुरुप ल्याइएका सत्रमध्ये दुई बुँदा नेपालका लागि लागू गर्न अनुपयुक्त रहेको बताइएको छ ।

उपाध्यक्ष डा खतिवडाले यसअघि ल्याइएका सहस्राब्दी विकास लक्ष्यलगायत योजना स्रोतसाधनको अभावका भौगोलिक तथा जातीय रुपमा सो अवधिभर लागू गर्न नसकिएकाले दिगो विकास लक्ष्यको सफलताका लागि आफू स्रोत जुटाउन डटेर लागिरहेको बताउनुभयो । उहाँले भन्नुभयो, “लक्ष्य पूरा गर्ने गृहकार्यमा हामी लागिसकेका छौँ, त्यसका लागि चैत महिनाभित्र तीनवर्षीय योजनाको खाका ल्याउछौँ, वैशाखसम्ममा तयार पार्दै बजेट त्यसै अनुरुपको ल्याउने छौँ, अबको विकास दिगो हुनुपर्छ, भन्ने हाम्रो मान्यता हो ।” रासस