संचार उद्यमी अरुण सिंघानिया हत्याका मुख्य योजनाकार पक्राउ

जनकपुरका संचार उद्यमी अरुण सिंघानियाको हत्याका मुख्य योजनाकार मानिएका जनतान्त्रिक टाइगर जनशक्ति पार्टीका अध्यक्ष चन्द्रदीप यादवलाई प्रहरीले पक्राउ गरेको छ । गएराती जनकपुर वडा नम्वर १ स्थित वकिल टोलबाट यादव पक्राउ परेको जनकपुर अंचल प्रहरी कार्यालयका वरिष्ठ प्रहरी उपरिक्षक सुरेश बिक्रम शाहले जानकारी दिनुभयो । यादवसँगै प्रमी रुक्मिनि देवी र भाईलाई पनि पक्राउ गरिएको छ । उनीहरुमाथि थप अनुसन्धान प्रक्रिया अगाडि बढाइएको वरिष्ठ प्रहरी उपरिक्षक शाहले बताउनुभयो । जनकपुरबाट प्रकाशित जनकपुर टुडे दैनिक पत्रिका तथा रेडियो टुडेका संचालक सिंघानियाको २०६६ साल फागुन १७ गते होली पर्वको दिन गोली प्रहारबाट हत्या भएको थियो । प्रहरी स्रोतका अनुसार पक्राउ परेका यादवले भारत विहारको विभिन्न प्रमुख शहरहरुमा बसेर आपराधिक क्रियाकलाप गर्दै आएको पाइएको छ । गत माघ २२ गते धनुषाको बालाबाखरमा नेपाली कांग्रेसका नेता राजेन्द्र यादवको हत्याको साथै बिरेन्द्र बजारमा नसिम मिंयालाई हत्याको प्रयास गरिएको अरोप पनि उनलाई लागेको छ । सिंघानिया हत्याको अर्का आरोपी मानिएका रामबिनोद यादव भने फरार छन् ।