कांग्रेसमा संसदीय दलको नेता छान्न विधान संशोधन गरिंदै

नेपाली कांग्रेसले संसदीय दलको नेता चयन प्रक्रिया सुरु गर्न विधान संसोधन गर्नु पर्ने भएको छ । दलको नेता चयन र विधान संसोधन प्रक्रिया अघि बढाउन आज निर्वाचन समितिको बैठक बस्दैछ । दलको विधान परिर्माजन गर्नुपर्ने भएपछि संसदीय दल निर्वाचनको टुंगो लाग्नेछ । बिहान ११ बजे कांग्रेस संसदीय दलको कार्यालय सिंहदबारमा बस्नेछ । निर्वाचन समितिको बैठकले निर्वाचन तालिकाका साथै संविधानको व्यवस्था अनुसार विधान संशोधन प्रक्रिया अघि बढाउनेछ । नयाँ संविधानको व्यवस्थाविपरीत संसदीय दल र कार्यसमितिमा विकास क्षेत्रका आधारमा सदस्य निर्वाचित गर्ने व्यवस्था छ । कांग्रेस संसदीय दलको विधानअनुसार दलका नेतासाथै पाँच विकास क्षेत्रबाट एक–एक जनाका दरले पाँच जना र समावेशीतर्फबाट १२ जनासहित दलको कार्यसमितिमा १७ जना छनोट गर्ने व्यवस्था छ । केही दिनअघि बसेको कांग्रेस केन्द्रीय कार्यसमितिको बैठकले संसदीय दलको नेताको चुनाव गराउन रमेश रिजालको संयोजकत्वमा तीन सदस्यीय समिति गठन गरेको थियो । संसदीय दलको नेतामा सभापति शेरबहादुर देउवा र वरिष्ठ नेता रामचन्द्र पौडेलबीच नै प्रतिस्पर्धा हुने देखिएको छ ।