विराटनगर, ४ चैत । पूर्वराष्ट्रपति डा रामवरण यादवले तराई, पहाड, हिमाल सबैको अस्तित्वलाई स्वीकार गर्दै अगाडि बढ्नुपर्ने बताउनुभएको छ ।
‘न्यु सृष्टि’ दैनिक पत्रिका पाँचाँै वर्षमा प्रवेश गरेको अवसरमा आज यहाँ आयोजित कार्यक्रममा उहाँले मधेसवादी दललाई लोकतन्त्रको सीमाभित्र बसेर अगाडि बढ्न, सरकारलाई सहिष्णु बन्न र ठूला दललाई सबैलाई विश्वासमा लिएर समाधानको बाटो खोज्न सुझाव दिनुभयो ।
राष्ट्र र समाजलाई जोड्नु नै राष्ट्रवादी बन्नु रहेको बताउँदै उहाँले भन्नुभयो, “टोपी, धोती, लुङ्गी लगाउने सबै नेपाली हुन् र सबै मिलेर राष्ट्र निर्माणमा जुट्नुपर्छ ।” संविधानमा समानुपातिक र समावेशीको व्यवस्था गरिएको बताउँदै उहाँले यसलाई व्यवहारमा उर्तानुपर्ने आवश्यकता औँल्याउनुभयो ।
पूर्वराष्ट्रपति डा यादवले पूर्व सामान्य प्रशासनमन्त्री लालबाबु पण्डितलाई २०७२ सालको ‘न्यु सृष्टि दैनिक म्यान अफ दि इयर’को सम्मान प्रदान गर्नुभयो । पूर्वमन्त्री पण्डितलाई निजामती ऐनमा संशोधन गरी दोहोरो नागरिकता रोकथामका साथै इमान्दारीपूर्वक काम गर्नुभएकाले सो सम्मान दिइएको हो ।
सो अवसरमा पूर्वमन्त्री पण्डितले राष्ट्रिय समस्यालाई आन्तरिक रुपमा समाधान गर्नुपर्ने र सकारात्मक सोचका साथ काँधमा काँध मिलाएर अगाडि बढ्नुपर्ने धारणा प्रकट गर्नुभयो ।
कार्यक्रममा भाषाशास्त्री बालकृष्ण पोखरेल र साहित्यकार बलराम पोखरेललाई साहित्य क्षेत्रका योगदान पु¥याएबापत जनही रु ११ हजार १११ राशिका साथै सम्मानपत्र प्रदान गरियो । त्यस्तै समाजसेवी केशवप्रसाद कोइरालाको स्मृतिमा स्थापित रु ११ हजार राशिको ‘सामाजिक सेवा पुरस्कार’ देवकिसन मुन्दडा र ‘न्यु सृष्टि दैनिक युवा उद्यमी पुरस्कार’ युवा उद्यमी श्याम राठीलाई प्रदान गरियो ।
यसैगरी रु ११ हजार १११ को ‘रामानन्द जाजु छात्रवृत्ति’ कृतिका दाहाल र दिनेश अधिकारीलाई संयुक्त रुपमा प्रदान गरियो । रु आठ हजार ८८८ राशिको ‘न्यु सृष्टि दैनिक स्वास्थ्य पुरस्कार’ डा श्यामकुमार रौनियारलाई दिइयो । रासस
No comments:
Post a Comment