काठमाडौँ, १९ फागुन । सर्वोच्च अदालत बार एसोसिएसनले न्याय परिषद्ले सर्वोच्च अदालतका लागि ११ न्यायाधीशको सिफारिस गरेकोप्रति स्वागत गरेको छ ।
सर्वोच्च बारले आज जारी गरेको प्रेस विज्ञप्तिमा लामो समयदेखि न्यायाधीश नियुक्त हुन नसक्दा न्याय पाउने हकबाट बञ्चित उपभोक्ताले न्याय पाउने र सर्वोच्च अदालतमा न्यायाधीशको पर्खाइमा रहेका करिब २२ हजार मुद्दा फछ्र्यौट हुने उल्लेख गरेको छ ।
न्याय परिषद्को मङ्गलबार बसेको बैठकले सर्वोच्च अदालतका लागि ११ जना न्यायाधीशको नाम सिफारिस गरेको थियो । सिफारिस हुने न्यायाधीशमा पुनरावेदनबाट मुख्य न्यायाधीश तहका दीपक कार्की, केदार चालिसे, शारदा घिमिरे, मीरा खड्का, विश्वम्भर श्रेष्ठ, ईश्वर खतिवडा र आनन्द मोहन भट्टराई हुनुहुन्छ ।
त्यस्तै, कानुन व्यवसायीमध्येबाट चार जना अधिवक्तामा हरिकृष्ण कार्की, प्रकाशमान राउत, सपना मल्ल प्रधान र अनिलकुमार सिन्हाको नाम सर्वोच्च अदालतको न्यायाधीशमा सिफारिस भएको छ ।
सिफारिस भएका ११ न्यायाधीशलाई संसदीय सुनुवाइ विशेष समितिले छलफलका लागि बोलाउने व्यवस्था छ । रासस
No comments:
Post a Comment