जनताको काम छिटो छरितो गर्न निर्देशन

चितवन, १८ चैत । भूमि सुधार तथा व्यवस्था राज्यमन्त्री विक्रम थापाले जनताको काम छिटो छरितो गर्न कर्मचारीलाई निर्देशन दिनुभएको छ ।

मालपोत र नापी कार्यालय भरतपुरको आज निरीक्षण पछि उहाँले जनताप्रति उत्तरदायी भएर काम गर्न कर्मचारीलाई निर्देशन दिनुभएको हो । सीमित स्रोत साधनको बाबजुत पनि जनमुखि सेवा दिन कर्मचारी अग्रसर हुनुपर्ने उहाँको भनाइ थियो ।

भूकम्पका कारण कमजोर भवनमा काम गर्नुपर्ने बाध्यता भए पनि यसकै कारण सेवाग्राहीको काम प्रभावित हुन नहुने मन्त्री थापाले बताउनुभयो । सो अवसरमा मालपोत कार्यालय प्रमुख टङ्कप्रसाद उपाध्यायले भूकम्पले कार्यालय भवन उच्च जोखिममा रहेको, पूर्वी चितवनमा सेवा केन्द्र आवश्यक भएको, साधन स्रोतको अभाव लगायत समस्याबारे मन्त्री थापालाई जानकारी गराउनुभएको थियो । रासस