कावासोती, १८ चैत । नवलपरासीको निरन्दीखोलामा निर्माण भइरहेको पुल ठेकेदारको लापर्बाहीका कारण ढिलाइ भएको छ ।
जिविस नवलपरासीले स्थानीय पूर्वाधार सडक निर्माणअन्तर्गत रु एक करोड ४२ लाखको लागतमा सडक निर्माणको ठेक्का शान्ति निर्माण सेवा प्रालि काठमाडाँैलाई दिएको थियो ।
दुई वर्षमा काम सम्पन्न गर्ने गरी सम्झौता गरेको पुलको १५ प्रतिशतभन्दा बढीको काम भएको छैन, जिविसका योजना अनुगमन तथा प्रशासकीय अधिकृत प्रकाश पन्थीले भन्नुभयो– “काम भएन त्यसैले थप १३ महिना समय थपेका छौँ ।” असार मसान्तमा यसको समयावधि सकिनेछ । जिविसले निर्माणमा ढिलाइ भएपछि २०७३ साउनबाट १३ महिना समय थप गरेको छ ।
पुल निर्माणका लागि आवश्यक पर्ने सामग्री ढुवानीमा समस्या भएको कारण समयमा काम सम्पन्न गर्न नसकिएको निर्माण कम्पनीका इञ्चार्ज विष्णुप्रसाद लामिछानेले बताउनुभयो ।
निर्माणको लागि आवश्यक पर्ने गिट्टी दलदलेबाट ल्याउनुपर्ने, आवश्यक इन्धन पनि प्राप्त नभएकाले निर्माण कार्यले तीव्रता पाउन नसकेको लामिछानेले बताउनुभयो ।
पुल नबन्दा पहाडी भेगका बासिन्दालाई वर्षायाममा आवतजावतमा समस्या हुने गरेको छ ।
ठेकेदारको ढिलासुस्तीका कारण निर्माण कार्य दुई वर्षमा पनि पूरा नभएकाले २०७२ असार मसान्तमा कार्य सम्पन्न गर्ने गरी निर्माण थालनी गरिएको भएपनि हालसम्म पुलको एकातर्फको पिल्लरको आधा भाग मात्र उठाइएको छ भने अर्कोतर्फ फाउन्डेसन निर्माण कार्य भइरहेको छ । रासस
No comments:
Post a Comment