बिस्केट जात्राको मार्ग अवलोकन गरिने

भक्तपुर, १९ चैत । मध्यपुर थिमि नगरपालिका क्षेत्रमा हुने बिस्केट जात्राको मार्गको अवस्थाका बारेमा आज एक टोलीले अवलोकन तथा निरीक्षण गर्ने भएको छ ।

नगरपालिका नेतृत्वको टोलीमा प्रशासन, नेपाल प्रहरी, सशस्त्र प्रहरी, स्थानीय गुथियार, सञ्चारकर्मी, राजनैतिक दलका प्रतिनिधि, स्थानीय समाजसेवी र संस्कृतिकर्मी रहने नपाले जनाएको छ । गत वैशाखको भूकम्पले क्षति पु¥याएका जात्रा सञ्चालन हुने मार्गका घरमा टेका लगाएको र ती टेकाले जात्रा सञ्चालनमा अवरोध र कठिनाइ उत्पन्न भएको भन्ने जनगुनासो आएपछि नपाले मार्ग अनुगमन तथा निरीक्षण गर्न लागिएको नपाका सूचना अधिकारी एवम् वरिष्ठ कानुन अधिकृत केशव सिलवालले जानकारी दिनुभयो ।

टोलीले स्थानीय वडा नं १ देखि १४ सम्मका बोडे, नगदेश, चपाचो, बालकुमारी क्षेत्रको अवलोकन तथा निरीक्षण गर्ने सिलवालले बताउनुभयो । टोलीले अवलोकन र निरीक्षणपछि आवश्यक परेको खण्डमा जात्राको मार्ग परिमार्जन गर्ने सम्बन्धमा स्थानीयवासीसँग आवश्यक छलफल गरी जात्राको मार्ग परिमार्जनसमेत गरिने सिलवालले जानकारी दिनुभयो ।

मध्यपुर थिमि क्षेत्रमा चैत ३० देखि वैशाख ३ गतेसम्म विभिन्न देवीदेवताका खटसहित सिन्दूरजात्रा हुन्छ । यही वैशाख २ गते बोडेमा हुने जिब्रो छेड्ने जात्रा विश्व प्रसिद्ध रहेको छ । रासस