पालुङटार (गोरखा), १७ वैशाख । भूकम्पले क्षति पु¥याएको गाउँ, बस्ती पुनःनिर्माण गर्न र स्थानीय निकायको निर्वाचनका लागि आवश्यक तयारीमा जुट्न नेपाली काँग्रेसका केन्द्रीय सदस्यले गोरखावासी कार्यकर्तालाई आग्रह गरेका छन् ।
पालुङटार काँग्रेस नगर समितिको आज पार्टी कार्यालय उद्घाटनमा बोल्दै काँग्रेसका केन्द्रीय सदस्यहरु विमलेन्द्र निधि, कमला पन्त, सुरेन्द्रराज पाण्डे, शङ्कर भण्डारी र गोविन्द भट्टराईले भूकम्पपीडित जनताको आवास पुनःनिर्माणमा जुट्न र स्थानीय निकायको चुनावका लागि तयारी गर्न आग्रह गनु भएको हो ।
पार्टीले हरेक गाउँमा इन्जिनियरसँगै २० जनाभन्दा बढी कार्यकर्ता खटाउने घोषणा गरेको भन्दै पूर्व महामन्त्री तथा सांसद निधिले पुनःनिर्माणको कामलाई तीव्रता दिनुपर्ने बताउनुभयो । भूकम्प गएको वर्ष दिन भइसके पनि पुनःनिर्माणको काम सन्तोषजनक नभएकोमा काँग्रेस नेताले सरकारको आलोचना गरेका थिए ।
कार्यक्रममा सांसद कमला पन्तले महँगी, कालोबजारी रोक्न अहिलेको सरकार असफल भएको धारणा राख्नु भयो । बर्खाअघि नै भूकम्पपीडितले नयाँ घर बनाउन सक्ने गरी अनुदान रकम दिनुपर्ने उहाँको भनाइ छ ।
यस्तै केन्द्रीय सदस्य पाण्डेले पुनःनिर्माणसँगै देशमा आर्थिक समृद्धि, विकासका पूर्वाधार खडा गर्ने खालका कार्यक्रम लागू गर्नुपर्नेमा जोड दिनुभयो । अर्का केन्द्रीय सदस्य भण्डारीले देशमा भ्रष्टाचार, कालोबजारी बढेको भन्दै सरकारले तत्कालै रोकथाम नगरे सदनदेखि सडकसम्म आन्दोलन गर्ने चेतावनी दिनुभयो ।
केन्द्रीय सदस्य भट्टराईले तराईमा देखिएको समस्याको समाधान अहिलेको संविधानअनुसार नै समाधान गर्न सकिने बताउनुभयो ।
काँग्रेस जिल्ला कार्य समितिका सचिव पूर्णबहादुर दाहालले महाधिवेशनपछि पार्टीको रणनीति र सङ्गठन सुदृणीकरणका लागि प्रशिक्षण अभियान सञ्चालन गरिएको बताउनुभयो । रासस
No comments:
Post a Comment