वालिङ, १८ वैशाख । स्याङ्जाको पेलाकोट गाविसको वडा नं ७ चोकमा आज दिउँसो आगलागी हुँदा १० घर जलेर पूर्णरुपमा नष्ट भएको छ ।
आगलागीमा परी १० घरसँगै १७ गोठमा पूर्ण क्षति पुगेको वडा प्रहरी कार्यालयका प्रहरी निरीक्षक उत्तमप्रकाश बरालले बताउनुभयो । आगलागीबाट दुईवटा भैँसी तथा चारवटा बाख्रा जलेर मरेका छन् ।
अपराह्न करिब १२ बजेतिर खरबारीबाट सुरु भएको आगो चोक, वीरडाँडा, बासकोटका बस्तीमा प्रवेश गरेको थियो । आगो कसरी लाग्यो भन्ने खुल्न सकेको छैन । आगो नियन्त्रणमा लिन नेपाल प्रहरी, सशस्त्र प्रहरी तथा स्थानीयवासीले आगोलाई झन्डै सात घन्टापछि नियन्त्रणमा लिएका हुन् ।
आगलागी भएको स्थानमा पानीको अभाव भएकाले पनि आगो नियन्त्रणमा लिन ढिलाइ भएको र दिउँसो बढी हावाहुरी चलेकाले पनि आगो बस्तीमा पुगेको स्थानीयवासीको भनाइ छ ।
त्यस्तै उता जगत्रदेवी गाविसको बल्पुकमा पनि अहिले आगलागी भइरहेकाले प्रहरी घटनास्थलतर्फ परिचालन गरिएको प्रहरी निरीक्षक बरालले बताउनुभयो । रासस
No comments:
Post a Comment