बन्द पासाङल्हामु मार्ग खुला

धुन्चे (रसुवा), १८ वैशाख । रसुवा जिल्लाको राम्चे गाविस वडा नं १ मूलखर्कमा कन्टेनर ट्रक दुर्घटना हुँदा अवरुद्ध पासाङल्हामु मार्ग आज साँझ ७ बजेदेखि खुला भएको छ ।

जिल्ला प्रहरी प्रमुख अवदेश विष्टका अनुसार काठमाडौँबाट आज बिहान झिकाइएको क्रेनले शुक्रबार राति १० बजे दुर्घटना भएको एक र एक्सल भाँचिएर गुड्न नसकेका र अन्य दुईसमेत तीन कन्टेनरलाई व्यवस्थापन गरी यातायात सञ्चालन गरिएको हो ।

मूलखर्क क्षेत्र कच्ची साँघुरो स्थान भएका कारण केरुङबाट सामान ल्याएका र स्थानीयस्तरमा गुड्ने १५० भन्दा बढी सवारीसाधनलाई पालैपालो गरी गन्तव्यतर्फ पठाउन नेपाल प्रहरीले व्यवस्थापन गरिरहेको प्रहरी प्रमुख विष्टले जानकारी दिनुभयो ।

राम्चे तथा मूलखर्कको पहिरो क्षेत्रमा सडक अत्यन्तै कच्ची र साँघुरो भएको ठाउँमा मर्मत हुन नसकेको र त्यही ठाउँबाट पार गर्दा सवारी साधनमा खराबी आई सडक बन्द हुने र अर्कोतर्फ चालक दलका सदस्यले पहिरोको बीचमा हैरानी पाउने गरेको प्रहरीले बताएको छ । रासस
––––––––