इटहरी, २९ चैत । गृहमन्त्री शक्तिबहादुर बस्नेतले पूर्वी नेपालको सुरक्षा चुनौतीका विषयमा मिहीन र गम्भीर छलफल भएको र छलफलबाट शान्ति सुरक्षा कायम गर्ने विषयमा प्राप्त सुझावलाई लिपिबद्ध गर्ने कार्य भएको बताउनुभएको छ ।
उहाँले जातीय, क्षेत्रीय र सङ्घीय सीमाङ्कनका मुद्दाका विषयमा उठेका विषय तथा त्यसले भविष्यमा उत्पन्न गराउन सक्ने आन्दोलनको अवस्थाका विषयमा समेत विस्तृत छलफल गरेकोले अब चाँडै मन्त्रालयले त्यसलाई अरु मूर्तरुप दिन कार्य अघि बढाउने पनि सहमति बनेको बताउनुभयो ।
गृहमन्त्री बस्नेतले आज इटहरीमा इलाका प्रहरी कार्यालय भवन निर्माण गरिने जग्गासम्बन्धि जानकारी लिँदै पूर्वाञ्चलको केन्द्रविन्दुका रुपमा विकास भई सकेको इटहरीको सुरक्षा अवस्थालाई नियन्त्रणमा राख्नका लागि प्रहरीको भौतिक संरचना पनि मजबुत हुन जरुरी रहेको तर्फ मन्त्रालय जानकार रहेको पनि स्पष्ट पार्नुभयो ।
अवलोकनका क्रममा इलाका प्रहरी कार्यालय इटहरीका प्रहरी नायब उपरीक्षक ओमप्रसाद अधिकारीले पछिल्लो प्रगतिका विषयमा मन्त्री बस्नेतलाई अवगत गराउनु भएको थियो ।
साथै, सोही अवसरमा नेपाली काँग्रेसका इटहरी उपमहानगर सभापति हेमकर्ण पौडेल, उद्योग वाणिज्य सङ्घ इटहरीका वरिष्ठ उपाध्यक्ष ईश्वरी पराजुलीलगायतले प्रधानमन्त्रीले सार्वजनिक समारोहमा नै इलाका प्रहरी कार्यालय इटहरीलाई एक विघा जमिन उपलब्ध गराइने भनेर बोलिसक्नुभएकाले त्यो चाँडो कार्यान्वयन गराउन मन्त्री बस्नेतलाई आग्रह गर्नुभयो ।
त्यस अवसरमा नेपाल प्रहरीका प्रहरी महानिरीक्षक उपेन्द्रकान्त अर्याल, सशस्त्र प्रहरी महानिरीक्षक दुर्जकुमार राईलगायतको उपस्थिति थियो । रासस
––––––––––
No comments:
Post a Comment