आगलागीबाट चौध घर जले

बागलुङ, १८ वैशाख । जिल्लाको धुल्लुबास्कोट–१ भाङ्खर्कमा आगलागीबाट दर्जन बढी घर जलेर नष्ट भएका छन् ।

शनिबार बिहान १०ः४५ बजेतिर लागेको आगोले झुले बस्तीका १४ घरमा पूर्णरुपमा क्षति पु¥याएको घटनास्थलबाट स्थानीय सन्तोष दगामीले जानकारी दिनुभयो ।

तीव्रगतिको हावाहुरीसँगै तलबाट बस्तीमा छिरेको आगो फैलिएर घरसहित गोठमा समेत क्षति पुगेको छ । आगलागीपछि मानिसहरु घरबाट भागेर ज्यान जोगाउन सफल भएका छन् । दगामीले घर, गोठ जलिरहेको र आगो नियन्त्रण बाहिर रहेको बताउनुभयो । आगो छिमेकी राङ्खानी गाविसको किटेनीतर्फ फैलिँदै गएको उहाँको भनाइ छ ।

किटेनीको बस्ती पनि जोखिममा रहेकाले आवश्यक सजगता अपनाउन गाउँलेलाई आग्रह गरिएको छ । आगलागी भएको क्षेत्रमा इलाका प्रहरी कार्यालय बरेङबाट प्रहरी टोली आएको राङ्खानीबाट प्रकाश छन्त्यालले जानकारी दिनुभयो । प्रहरी र स्थानीयवासी मिलेर आगो नियन्त्रणमा ल्याउने प्रयास भइरहेको छ । ठूलो क्षेत्रमा आगो फैलिएकाले नियन्त्रणमा ल्याउन कठिन भइरहेको जनाइएको छ ।

आगो नियन्त्रणमा खटिन र सम्भावित जोखिमबाट बच्न सबैलाई आग्रह गरिएको प्रहरीले जनाएको छ । आगलागीबाट कुनै मानवीय क्षति भने भएको छैन । आगलागीको विस्तृत विवरण भने आउन बाँकी छ । लामो खडेरीले जिल्लाका विभिन्न भूभागमा आगलागीका घटना भइरहेका छन् । रासस