काठमाडौँ, २६ चैत । नेकपा (एमाले) को पोलिटब्युरोको बैठक नसकिए पनि शनिबार पार्टीको पूर्व निर्धारित केन्द्रीय कमिटीको बैठक बस्ने भएको छ ।
एक वर्षको अन्तरालपछि केन्द्रीय कमिटीको बैठक बस्न लागेको हो । शनिबार प्रधानमन्त्री निवास बालुवाटारमा केन्द्रीय कमिटीको बैठकको उद्घाटन भई अध्यक्ष तथा प्रधानमन्त्री केपी शर्मा ओलीको प्रतिवेदन वितरण गर्नुभएपछि पुनःपोलिटब्युरोको बैठकले निरन्तरता पाउने एमाले केन्द्रीय कार्यालयका सचिव कृष्णगोपल श्रेष्ठले जानकारी दिनुभयो ।
आज साँझ बालुवाटरमा भएको पोलिटब्युरो बैठकमा केन्द्रीय कमिटी बैठक सार्न नेता डा विजय पौडेले प्रस्ताव गरेपनि त्यसलाई बैठकले स्वीकार गरेन । पोलिटब्युरोको बैठक यही चैत २३ गतेदेखि जारी छ ।
बैठकमा केन्द्रीय विभाग र सल्लाहकार समितिमा मनोनयन, पार्टीको भवन निर्माण, विधान संशोधन, केन्द्रीय निकायका प्रतिवेदनलगायत कार्यसूची छन् ।
यसैबीच शनिबार नै एमालेले पञ्चायतकालमा मारिएका सहिद रत्नकुमार वान्तवाको स्मृति दिवस मनाउँदैछ । रासस
No comments:
Post a Comment